《炒股戰記－施富》戰事疫情監管三重夾擊，市況未明買領展較穩陣

　　呢兩個禮拜，魚缸都受到俄烏戰事、疫情升級、科網股監管等因素影響，早兩日夾埋跌超過2000點，曾經見過18235點，都搞到灰灰哋。去到今日晏晝，阿爺同大家大派定心丸，話中美兩國「已取得積極進展」，會繼續支持各類企業到境外上市，魚缸一口氣反彈超過1600點，重上兩萬點關口，似乎又重燃番希望。
　　不過，富仔覺得中美風向隨時會變，今日呢單消息相信對魚缸幫助好短暫。反而，大家應該要將焦點放喺嚟緊嘅聯儲局議息上，畢竟美國通脹已經創40年新高，拜登政府再無咩實際措施壓抑通脹，嚟緊嘅中期選都幾大影響，聯儲局又會唔會好似市場預期咁，淨係加四分一厘息？其實仲係未知知數。另外，俄烏兩邊都只係話會繼續傾，但未有實際進展之前，富仔都唔會現階段好積極入市。
　　之前揀過嘅理想(02015)，早排受到中概股監管嘅因素影響係咁跌，連2月橫行區底部103銀水平都穿埋，即使今日跟住魚缸上升，一度反彈超過三成，重上90銀以上水平，但係富仔要嚴守止蝕位，一穿咗就要走人，所以喺103銀已經止蝕，損失未致好大。
　
*領展防守性強兼收息*
　
　　既然魚缸前路仲係未太穩，富仔都要揀番啲收息股保一保平安先。除咗上次提到嘅電盈(00008)之外，今次揀多隻防守性比較強嘅領展(00823)。
　　睇番領展直至舊年9月底為止半年，香港零售物業組合出租率有增長率達到97.5%，創歷史新高，平均續租租金調整率亦升3.4%，平均租金維持喺每平方呎62.4銀水平。
　　領展除咗喺香港有業務，集團都不斷擴張海外物業組合，上個月就同國際房地產投資集團Oxford Properties籌組合資公司，投資喺澳洲悉尼同墨爾本各自核心商業區嘅5個商廈物業。領展佔合資公司近五成權益，有關物業估值11.31億澳紙，平均出租率92.6%。
　　令富仔較為鍾意領展嘅另一個原因，係因為喺疫情肆虐之下，領展嘅成績都算做得唔錯，而呢排市民相信都會喺自己住嗰頭附近買嘢，都唔走得太遠買嘢，領展旗下有唔少商場，業務表現應該唔會差得好緊要。另外，依家規定入商場要出示有效嘅疫苗通行證，但隨住疫苗接種率不斷提高，未至於對領展有好大影響。
　
*中長線目標75銀*
　
　　 睇番日線圖，股價喺舊年11月中旬開始，形成一個橫行區，直到今年2月初開始跌足一個月。3月初跌到位59.75銀後反彈，升到64.9銀之後唔係好夠力再上。不過，依家股價仲企穩喺10天線上，而10天線已經開始上升，MACD牛差距仲好平穩，似乎喺度整固緊。現價計，預測股息率約5厘，派息算ok，而且公司財務健康，抗跌力亦比較強，用嚟做收息股係個唔錯嘅選擇。富仔喺62.5銀買咗1000股，部署上會睇長少少。
　　月線圖睇，股價喺2020年1月破過75銀，但好快倒V跌返落去，2月再挑戰失敗；2021年6同7月三度挑戰75銀水平，結果都唔成功，相信呢個係一個幾大嘅阻力位，中長線目標放喺75銀。止蝕位方面，如果跌穿2020年嘅全年低位50.3銀水平就離場。
　
　　　　　　　　　　　　　　　　沽出之股份及收益(虧損)