《炒股戰記－施富》魚缸反彈空間唔多？今次揀車股同光伏股！

　
　　兩個禮拜又過去，魚缸由10號低位19178反彈到20號高位20794，呢度都升咗超過1500點，近三日有啲回落，雖然10天線有上升趨勢，但2月尾開始已經三次挑戰50天線失敗，似乎呢條平均線會係幾大阻力，富仔相信魚缸嚟緊再向上彈嘅空間唔多。
　　畢竟，今年以嚟大部分日子嘅成交都係千幾億鬆啲，美國又話中概股會計監管上「仍存在重大問題」，即使劉鶴早排放風話支持平台經濟健康發展，又有傳汽車下鄉即將出台，對魚缸都唔係好大幫助。富仔覺得，內地疫情、俄烏局勢、加息問題同中美博奕仍然係關注點，中概股炒下波幅算喇。
　
*美團、吉利成功食胡*
　
　　睇番個倉先，美團(03690)升到近180銀附近真係有啲阻力，富仔喺175銀就食胡，沽咗700股，計番都有20幾蚊升幅，盈利都算唔錯，至於剩低嘅300股就睇200銀，總之跌穿130銀就止蝕喇。
　　另外，吉利(00175)橫行完一輪，因為近期有唔少有利車股嘅政策出台，股價由上兩個星期開始突破橫行區，終於升到上14銀嘅目標，富仔將5000股全部沽出，並且會換馬，陣間再講。
　　
*比亞迪初步目標286銀*
　　
　　今次富仔個倉加咗兩隻股票，第一隻係比亞迪(01211)。作為新能源車嘅龍頭，比亞迪嘅基本面比起其他車股都好啲。只係講4月份新能源車銷量按年升3.13倍，受疫情影響之下都仲有咁嘅表現，已經好唔話得。根據中國汽車工業協會統計分析，今年頭四個月汽車銷量排名前十位嘅企業合共銷售659.4萬架車，同舊年同期相比，比亞迪銷量增速依然最明顯，另外除咗廣汽同奇瑞之外，其他企業都呈下降，已經反映比亞迪係幾咁硬淨。
　　即使比亞迪早排受到長沙車廠受污染嘅事件影響，一度要停產，但係據內地傳媒引述比亞迪長沙廠區附近嘅中建嘉同城業主處報道，相關部門已經喺小區安裝VOCs(揮發性有機物)在線監測系統，以檢測小區環境狀況，相信對公司生產唔會造成嚴重影響。更何況，阿爺宣布減徵部分乘用車稅600億人仔，呢個政策相信對汽車業有好大刺激，比亞迪又作為行內龍頭之一，買落都會安心啲丫。
　　睇番日線圖，股價自從突破4月份到5月初嘅阻力位244銀水平keep到個升勢，10天、20天同50天線都向上行，近日升到最高274.8銀後就有少少回落，但富仔相信比亞迪走勢上仍然ok，早排升咗咁多，依家估會整固下再升。我喺252.2銀買咗2000股，如果用黃金比率回調，由舊年全年高位324.6銀向下量度到今年低位165銀，第一個目標會係0.764倍反彈位286銀附近，到價會沽1000股，剩低500股就睇320銀水平。
　
*信義玻璃短線目標20.5銀*
　
　　第二隻係信義玻璃(00868)。身為光伏股之一，有望受惠於國策。國家發展改革委、國家能源局印發嘅《「十四五」現代能源體系規劃》提到，全面推進風電同太陽能發電大規模開發同高質量發展，優先就地就近開發利用，加快負荷中心同周邊地區分散式風電，同分布式光伏建設，推廣應用低風速風電技術。嚟緊碳中和會成為全球趨勢，光伏股中長線嘅前景都樂觀嘅。
　　如果對比同系嘅信義光能(00968)，大家都係光伏股。當然，從股價嚟講，信義光能會比較抵買啲，但股價近期喺14銀有啲阻力，現價買入唔太值博。同埋，信義光能預期周息率只有約2厘，信義玻璃反而有約6厘預期周息率，攞嚟收息都唔錯。
　　信義玻璃股價近期走勢都唔錯。自從由4月26號低位15.94銀反彈之後，股價就維持一段唔錯嘅升勢。依家仍然企穩喺10天同20天線之上，而呢兩條線升勢仲未放緩，MACD保持牛差距，短線仲可以博佢繼續上。富仔喺19.14銀買咗4000股，短線目標20.5銀附近，到價會沽3000股，剩低1000股就會睇22銀附近。
　　
　　　　　　　　　　　　　　　　沽出之股份及收益(虧損)