按盤價 
《小傳日記》魚缸業績期嘅焦點，當然就係噚日ＱＱ（００７００）公布嘅第二季業績，出
嚟非國際財務報告準則盈利大約２８１億人仔，雖然按年跌１７巴仙，不過都已經好過孖屐預期
。而好多人都睇淡嘅「打機」業務，結果按年都係微跌０﹒４６巴仙，都算有交代。
今次業績嘅一大焦點，都算係ＷｅＣｈａｔ旗下視頻號，績前孖屐都已經非常關注，績後更
加獲孖屐同大行一齊唱好。ＱＱ成績表入面就寫，「視頻號總用戶使用時長超過了朋友圈總用戶
使用時長的８０％，總視頻播放量同比增長超過２００％，基於人工智能推薦的視頻播放量同比
增長超過４００％」。
無玩開ＷｅＣｈａｔ嘅缸友未必知，視頻號其實就係類似抖音同ＩＧ嘅混合體，一路向下碌
就會睇到唔同自己ｆｏｌｌｏｗ嘅嘢，會有類似抖音嘅ｍｅｍｅｓ片等，碌到底就會有ＡＩ推介
嘅相同類型資訊睇得到。ＱＱ自己都寫，基於ＡＩ推薦嘅視頻播放量按年大增４倍，呢一點一來
引證ＷｅＣｈａｔ嘅龐大用戶群，二來都證明ＱＱ大數據方面嘅成功。
愈來愈多人睇又愈睇愈耐，證明由ＡＩ推介出嚟嘅內容都成功ｃｌｉｃｋ中咗用戶嘅喜好，
當然背後係要分析用戶平日選擇內容嘅偏好，繼而投其所好供應內容。據講快手（０１０２４）
、抖音分別用９年同３年先達到３億每日活躍用戶量，但係背靠ＷｅＣｈａｔ嘅視頻號１年半就
搞掂，證明ＱＱ可以發到力又搵啱路嘅話，唔怪之得績後大行一致畀ｌｉｋｅ。
不過都要留意槍打出頭鳥，熱度高就容易招來監管之手，視頻號跑出一來係因為沉浸式嘅內
容供應，二來內容製作者自己都搵到錢，吸引咗好多網紅博主利用流量變現。但凡涉及「錢」就
容易出狀況，最好ＱＱ喺出事前就要塞好有機會漏水嘅窿，如果出事先處理就洩咗道氣啦，請請
！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
