按盤價 
《小傳日記》２０２４年開局兩日，魚缸就插足兩日，以為恒指２０２３年１７０００齊頭
收個靚尾，結果今年就開個衰頭，認真唔老黎。不過都有返啲「好」消息；雖然早排針對遊戲股
嘅「冬至驚魂」仲係猶有餘悸，不過今日就有劇劇性進展。
據《路透》引述知情人士爆料，中宣部出版局局長馮士新上個禮拜經已被免職，據講馮士新
被炒好有可能同當日遊戲監管新規有關，不過官方仍然未就有關報道內容回應。
事發當日係冬至，距離２０２３年結剩低一星期左右，結果當日魚缸升市期間忽然爆出呢條
「徵求意見稿」，未到半日遊戲股急轉跌，網易（０９９９９）跌都話，ＱＱ（００７００）係
主宰魚缸嘅重磅股王，連佢都要跌，魚缸都被逼攬住一齊跌。雖然半日下晝時候官媒已經放風話
「徵求意見稿」即係未落實，仲有商量空間，不過一江春水向東流，令網易原本保住嘅全年四成
升幅，最後只係得返接近三成。
事實上當日消息出來都令市場非常震撼，一來監管消息已經無見好耐，二來力度之大直頭似
有生閹遊戲股感覺，同過去半年嘅政策風向明顯唔同。所以當日跌除咗對遊戲股收入嘅憂慮，更
加係政策風向急轉嘅恐懼。當日孖屐普遍都非常疑惑，近期吹緊扶持經濟風，竟然又會喺年尾埋
數出「大絕」，令遊戲股年結時翻身都無機會；如今官媒頻頻放風，兼夾傳出涉事官員被免職，
相信遊戲業界同財經界都會明白返，阿爺風向未至於咁急轉。
近期中央有意趁減息周期開始刺激經濟，各方面都發出緊善意同積極訊息，有利市場嘅措施
相信會更為孖屐所受落。如今網易同ＱＱ都逐步向上修復，應該孖屐都收到阿爺訊號，扶持經濟
係會繼續。不過雖然炒咗人，但係「徵求意見稿」出咗都好難收得返，之後如果調整力度太大，
孖屐會過份興奮，唔調整又會大失所望，所以新規會改成點都好關鍵。今日網易就主動迎合「防
沉迷」，喺首批３４款產品推出「未成年人模式」，先做一步，正好為當局再鬆鬆手出一分力，
請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
