《魚缸博客》近期沉寂嘅騰訊連升兩日，仲有無得上？

　　《魚缸博客》近期股市反反覆覆，除咗因為大家對個市信心不足之外，仲因為受到外圍同內
在嘅因素所影響。對外方面，中美持續角力，美國一時又話晶片違反出口禁令，一時又話禁用中
國生產之電腦，結果搞到一眾相關股如中芯（００９８１）、聯想控股（００９９２）等受池魚
殃及。一時又搞甚麼《生物安全法》，搞到藥明生物（０２２６９）等相關股份急插。對內中央
對內房企業嘅政策亦不時更新，而且電動車呢兩年大行其道，比亞迪（０１２１１）甚至理想汽
車（０２０１５）都搶去唔少風頭，市場焦點早已分散到唔同股份同板塊。
　　或者市場焦點太多，搞到大家都忘記咗昔日嘅「股王」騰訊（００７００）。但一講起「股
王」二字，同事立即提醒我最好用「前股王」。畢竟今時不同往日，股王嘅鋒芒早已今非昔比。
或者係沉寂咗太耐，騰訊呢兩日突然發威，昨日抽升３﹒７％，今日逆市再升，執筆時升約２％
，而大市其實仲跌緊成百點。
　　同事講得都無錯，騰訊確實不復當年勇。數字最現實，單睇業績就說明一切。騰訊舊年賺少
３８﹒８％去到１１５２億元人仔。賺成千億元本來唔簡單，但對比２０２１年賺２２４８億人
仔，唔使多講，大家都知分別有幾大。騰訊盈利連跌兩年，再咁落去唔係辦法，集團如果搵唔到
新的業務增長點，只怕逆水行舟，不進則退。
　　雖然業績唔好，但現時股價都唔夠高峰期一半，短炒唔太貪心嘅話，應該仲有得上，３３０
銀都唔係無機會。（ｖｓ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。