買完鐵路股之後，成個板塊逆市插，估唔到一帶一路概念咁靠唔住。不過經歷上次ＱＱ（００７００）亂局之後，阿臣個人定咗好多，睇番買入嘅中交建（０１８００）雖然失守１０天線（９﹒２４蚊）同２０天線（９﹒１４蚊），不過攤開兩個月嚟睇，仲處於上升通道之中，決定暫時冷處理。
＊阿臣旅行全憑感覺，匯率變差都不怕＊
又到阿臣又愛又恨嘅１２月，工作無咁繁重之餘，睇多啲聖誕燈飾，人都開心啲，不過聽到「誰又騎著那鹿車飛過」之類嘅歌詞，又感受到一絲惆悵……不要再說了，去旅行好過！
阿臣係個隨時準備旅行嘅人，早喺１０月已經買好機票，準備去日本玩番轉。我估一定會有網民朋友心諗，日圓急升得咁誇張，以前買食玩通通打六折嘅日子已經不再，咁嘅時勢去遊日好唔抵。阿臣反而覺得，有好多嘢都唔可以用金錢去衡量，記得當年中學畢業旅行第一次去日本，就已經深深留戀呢個地方，民眾有公德心，到處都有好風光，社會運作井井有序，對於葉公好龍嘅觀光客嚟講，實在係一個勝地。
好在阿臣運氣其實亦唔錯，無諗過美元企硬衝高高，連日圓都要跌番落去，我趁機入返些少日圓，旅行預算變得輕鬆啲。話說回來，阿臣之前狠踩過特朗普，點知佢當選之後，美國通脹數據靚仔咗，美元升咗，連加息預期都爆晒燈，成效之大奧巴馬都望塵莫及，簡直係黑色幽默。
＊深港通開場失利，外媒冷嘲贈慶＊
深港通禮拜一（５日）就通咗，不過一如阿臣所料，反應唔大，用「外國勢力」媒體嘅話嚟講，就係「ｌｉｔｔｌｅ ｎｏｔｉｃｅｄ」（不被注意的），港交所（００３８８）同一眾券商股都無咩動靜，連ＱＱ都唔見深圳朋友支持，難為傳媒幾個月來報完又報，到頭來都係雷聲大雨點小。
古臣知道呢幾日英國法院審理緊脫歐案，硬脫歐方案有機會重見天日，而且美國好快將會加息，令港股可能有震盪，所以決定本周按兵不動專心工作。阿臣並唔係畏懼世事變改，而係「愈跌愈愛」，等啲魚毛蝦仔變平之後再部署。
表列截至１２月６日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
電能 ５００股 ７１﹒９０元 ７２﹒１５元 ３６０７５元
中交建 １０００股 ９﹒２５元 ９﹒０５元 ９０５０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：４５１２５元
剩餘現金 ：１８７４８元
組合淨值 ：６３８７３元
組合本周收益表現：－１﹒１２％
組合本月收益表現：－１﹒８１％（截至１１月底止組合淨值：６５０４８元）
組合累計收益表現：－１﹒７６％（本金６５０００元）
＊數據截至今日中午收市
全新節目《說說心理話》青少年不可以戀愛！？真實個案講述驚心動魄經歷► 即睇
