《古臣周記》中美貿易戰嘅陰霾繼續揮之不去,華為大小姐孟晚舟涉嫌違反花旗國禁令,向
伊朗出售設備,喺楓葉國(加拿大)被捕,相關事件仲火燒連環船,令到一眾5G概念股、華為
供應商,甚至大象(00005)牽涉其中,導致魚缸連日急跌,早前花旗國仲暗示會以孟晚舟
做中美貿易嘅籌碼。唉!睇嚟中美問題都難一朝一夕可以解決喇,不過影響魚缸嘅因素又點止一
個呢?
*美債孳息曲線倒掛,長息低過短息*
上星期阿臣講過美債孳息曲線出現倒掛嘅情況,不過缸友們又知唔知倒掛係咩?不如等阿臣
略略講吓先。孳息曲線倒掛其實就係講緊,長期債嘅息率比短期債息率為低,理論上債仔借「長
錢」當然比借「短錢」要畀高啲嘅息,一來通脹因素令昨日嘅錢比今日更有價值,二來時間愈長
風險愈高,不過喺一啲「異常」嘅情況下,就會出現借「長錢」比借「短錢」還更少息嘅情況。
現時倒掛嘅情況,就出現喺花旗國中短期國債嘅孳息上,兩年期息就升到三年期息之上,而
且係2008年1月以嚟首次;而兩年同三年期息亦高過五年期息,其中最有指標,亦係現時大
家最驚嘅兩年息同十年期息就仲未出現倒掛,不過差距就曾經收窄至到不足10點子,係十年以
嚟最細嘅息差!
不過,缸友又會問因咩事今次美債孳息曲線會出現倒掛嘅情況呢?有新債王之稱嘅岡拉克就
話,由兩年期到五年期國債孳息走勢睇,反映市場唔信聯儲局早前提及喺2019年嘅加息計劃
,並預示經濟會喺未來兩年衰退,所以大家都睇到除咗香江呢邊跌,花旗國都有幾日大跌,好大
原因係因為大家都對未來經濟無信心。
*卅年四次倒掛,美國三次經濟衰退*
回顧自上世紀80年代起,兩年期同十年期國債孳息率倒掛總共出現過4次,其中有3次花
旗國經濟都喺13至23個月後陷入衰退。第一次倒掛喺1988年12月到1989年3月,
聯儲局一共加息16次,利率由6﹒75巴仙上調至9﹒8125巴仙,喺1989年花旗國已
經開始步入衰退,加上到1990年第三次石油危機正式爆發,石油價格上漲113巴仙,同年
7月(即倒掛19個月後)花旗國經濟正式進入衰退期。
第二次倒掛發生喺1998年5月到8月,歷時2個幾月,不過今次花旗國無步入衰退,因
為危機核心喺亞洲,亦係香江都認識嘅「亞洲金融風暴」。第三次倒掛發生喺2000年2月到
12月,歷時11個月,今次聯儲局同以住一樣為咗遏抑通脹,將利率由4﹒75巴仙上調至
6﹒5巴仙,13個月後就發生科網泡沫爆破。第四次倒掛就發生喺2006年到2007年6
月,歷時17個月,23個月之後就出現大家都記得嘅「金融海嘯」,所以話孳息曲線倒掛係幾
咁得人驚呢!
假如今個月聯儲局再加息一次,兩年期債息大約會喺2﹒9巴仙,同十年期債息2﹒9至3
巴仙基本持平。所以倒掛嘅情況可能會喺年底到2019年初發生,到時缸友都要密切留意,債
息嘅上落,因為今次呢波反彈浪完結,好大程度都係倒掛引起。
*未破四浪頂,港股難言轉勢*
講返阿臣個倉。
貿戰停火90日之後,原本大家都以為魚缸會開開心心過埋年就算,不過繼美債孳息曲線倒
掛之後,加上華為大小姐孟晚舟被捕嘅消息,魚缸反彈浪基本上都叫完結,雖然最新消息,大小
姐已經可以獲保釋而帶動魚缸重上二萬六關口,並收復50天線(約25953點),不過喺成
交再度縮水之下,亦然難講轉勢。技術上,魚缸自七月已呈現四個一浪低於一浪的形勢,而現時
港股處於第五浪,隨非短期可以突破四浪頂嘅位置(約28032點),否則港股可能喺
25500點到26000點之間上落機會較大。
個股方面,資金再走入公用股避險,粵海投資(00270)同領展(00823)走勢都
唔錯。其中領展仲試過創股價新高見79﹒55銀,但始終市場不明朗因素開始多,阿臣考慮緊
,係唔係應該空倉走人,定買一啲超跌嘅魚毛追落後呢?
另外,阿臣下星期會去外國感受聖誕氣氛,先喺呢度預祝大家新年快樂同聖誕快樂,來年賺
到盤滿缽滿。阿臣下年再同大家見面!
表列截至12月12日(11:00am止)投資組合表現:
股份 股數 平均買入價 現價 總值
----------------------------------------
港股:
寶勝 10000股 1﹒56元 1﹒50元 15000元
粵海投資 2000股 13﹒00元 15﹒06元 30120元
領展 500股 75﹒35元 78﹒35元 39175元
----------------------------------------
股票市值 : 84295元
剩餘現金 : 67971元
組合淨值 :152266元
組合本月收益表現: + 1﹒3%(截至上月底止組合淨值:150321元)
組合累計收益表現: +45﹒0%(本金105000元計)(2016年8月開倉)
*數據截至今日11:00am
樂本健【秋日開倉26 - 27/9】保健品低至$20!► 火速行動