按盤價 
《小傳日記》呢排好多「大孖沙」減倉，搞到缸友驚到騰騰震。「股神」巴菲特減持比亞迪
（０１２１１）嘅傳聞揮之不去，股價到依家仲未上番３００銀；騰訊（００７００）就畀南非
大股東逐步減持，股價一日弱過一日，前兩日已經跌穿３００銀關；紅杉資本中國始創人沈南鵬
又減持美團（０３６９０），雖然規模唔算大，但股價就繼續頹勢，今日仲跌穿過１００天線。
所謂「一不離二、二不離三」，阿里巴巴（０９９８８）亦據報畀軟銀減持，涉資超過
１７００萬。今日再有報道指，作為阿里巴巴早期投資者嘅英國長線投資基金公司
Ｂａｉｌｌｉｅ Ｇｉｆｆｏｒｄ，第二季近乎出售阿里全部ＡＤＲ，持倉量由原本１７５萬股
降到得番１３股。不過，消息指Ｂａｉｌｌｉｅ Ｇｉｆｆｏｒｄ只係將阿里持倉由美國上市
ＡＤＲ，轉到香港上市普通股。報道又指，因應美國ＳＥＣ只係要求投資公司披露美股持倉，有
關轉倉活動唔會反映喺披露文件。
值得留意嘅係，今次唔止阿里巴巴，Ｂａｉｌｌｉｅ Ｇｉｆｆｏｒｄ亦大手減持科技股持
倉。報道指出，Ｂａｉｌｌｉｅ Ｇｉｆｆｏｒｄ將京東（０９６１８）持倉亦由原本約６﹒８
萬股，降到得１股；網易（０９９９９）持股由２６﹒３萬股，下降６０％到１０﹒３萬股；百
度（０９８８８）ＡＤＲ持股由３７５萬股，降１８％到３０８萬股。
報道話，Ｂａｉｌｌｉｅ Ｇｉｆｆｏｒｄ認為，中美關係惡化、中概股退市風險同監管收
緊等，都係減持大批中資科網股嘅原因。有趣嘅係，Ｂａｉｌｌｉｅ Ｇｉｆｆｏｒｄ上季喺蔚
來（０９８６６）嘅持股增加９％到９６７３萬股。雖然同係中概股，但蔚來持股居然上升，唔
通Ｂａｉｌｌｉｅ Ｇｉｆｆｏｒｄ對蔚來情有獨鍾？請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
