按盤價 
《魚缸博客》恒指高開低走，恒指高開８８點或０﹒５％，開報１６９１９，其後曾高見
１６９４１，惟未能順勢突破１７０００關並掉頭回落，其後轉升為跌，低位見１６７５２。
大市冇咩好講，今日睇下啲金股。原因係現貨金價上周五（１日）創下２０７５美金歷史新
高後，今朝突破埋２１００美金，高見每盎司２１３５﹒３９美金。金價破頂，主要因為市場除
咗炒作聯儲局本月議息會唔加息之外，更預期明年開始減息，即係預期美金走弱，所以金價升。
金價升，金股多少會受惠。比較價細嘅大唐潼金（０８２９９）最高升到０﹒１７５銀，升
幅１６﹒６７％；另外，山東黃金（０１７８７）最多升６﹒１％；紫金（０２８９９）最多升
６﹒４％，靈寶黃金（０３３３０）最多升超過１３％。
最細粒嘅大唐潼金喺內地從事黃金勘探、開採及礦物加工業務。山東黃金主要喺內地從事黃
金採礦及加工，以及銷售黃金產品。紫金就從事黃金同其他礦產資源的勘探、採礦、生產、冶煉
及銷售。靈寶黃金主要從事黃金開採及冶煉，同埋黃金及其他珠寶零售業務。如果只係睇好金價
會繼續上升，就唔應該揀紫金。
技術上睇，大唐潼金已由１１月初高位０﹒２２９銀，回落到上星期五最低０﹒１４６銀，
依家５０天線正好同２５０天線（０﹒１４６）重疊，重拾升勢機會較大。雖然話每股價格相對
低，但每手等於２４０００股，成本唔算平，只係技術上應該完成調整，相對值博。望番前高
０﹒２２９銀，以現價０﹒１７３銀計都有３２％上升空間。另外，靈寶黃金同紫金都有技術突
破，靈寶黃金量度上升目標大約係１﹒７銀；紫金望住１３﹒８銀先。招金（０１８１８）就仲
未扭轉下跌形態，暫且放棄。
不過，大家都要留意國際金價走勢，同埋聯儲局喺下星期二、三（１２同１３日）召開嘅貨
幣政策會後聲明，仲有最新出爐嘅經濟預測。現貨金價選擇依家創新高，唔似咁快回落，估計明
年上半年都會維持喺２０００美金以上，如果打算喺收息以外做啲風險投資，依家似乎係金股嘅
時間！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet健康網購 | 6月限定優惠【送：明目藍莓精華36:1】乙樽► 火速行動
