《古臣周記》要抽新股王阿里巴巴(09988)今日(20日)中午就截止啦。喺阿里上
市之前,另一股王QQ(00700)因為業績唔夠阿里好,所以股價都受壓。兩隻都係神州科
網股巨頭,QQ同阿里除咗喺遊戲同電商領域各佔優勢,亦透過分拆子公司上市同入股其他公司
,去擴展互聯網業務版圖。
今日阿臣就嘗試由呢一個角度同大家分析同比較下,阿里系同QQ子公司嘅業務範疇同發展
潛力,從而決定部署買QQ定追隻阿里好。
*阿里影業迎戰貓眼娛樂,雙雄瓜分線上電影票務*
喺香江上市嘅阿里系公司業務涉獵多個範疇,例如娛樂、金融同健康等。首先,喺娛樂業務
方面,旗下嘅阿里影業(01060)主要從事電影互聯網宣傳發行業務,同QQ佔股近一成四
嘅貓眼娛樂(01896)喺行業形成寡頭壟斷。雖然阿里影業今年10月發盈警,預計中期虧
損擴大最多4億人仔,但主要對部分早期歷史股權投資項目作約1億銀嘅減值撥備。睇返舊年份
全年業績,主要業務互聯網宣傳發行轉虧為盈,錄得分部溢利3﹒88億銀。
有分析指,隨著神州移動支付日漸普及,上網買戲飛會逐漸取代傳統電影院購票服務。而阿
里影業旗下「淘票票」品牌喺電影投資、大數據宣傳同電影副產品方面表現出色,貓眼娛樂亦可
以利用QQ有份入股嘅美團(03690)嘅優勢,將外賣團購同電影購票相結合,形成協同效
應。
兩者業務前景除咗取決於自身嘅特長之外,亦取決於神州電影孖屐嘅需求。喺啱啱過去嘅「
十一黃金周」,大行細摩就發表報告,指出單係三套愛國電影就佔整體票房九成七,帶動今年以
來累積票房由跌轉升。講到切合觀眾口味,阿臣認為有大數據優勢幫助,阿里影業可有效物色同
參與大眾化口味電影嘅製作;不過,論市佔率而言,貓眼呢個平台仍然領先阿里。
*送藥上門業務有望撈得起,憧憬阿里健康可扭虧*
話就話貓眼娛樂係神州線上最大嘅電影分銷平台,加上又有QQ撐腰,理應如魚得水。之但
係佢同唔少新經濟股一樣,一直靠燒錢去擴大市佔率。雖然今年上半年佢成功扭虧為盈,主要因
為期內銷售開支大減四成七所致,但缸友依然唔賣帳,今年二月掛牌以嚟一直潛水。阿臣再睇返
今年國慶黃金周既票房,已經突破咗50億人仔,創埋歷史新高,但即使係咁又如何,貓眼股價
依然不動如山,繼續係低位潛行,每日成交更只有區區幾百萬,阿臣真係冇眼睇,睇嚟要等到業
績真係持續好轉先至會有轉機。
至於醫療健康業務方面,阿里喺呢一方面似乎略勝一籌,旗下阿里健康(00241)目前
市值已接近千億銀。相反,QQ雖然八足咁多爪,但喺醫療健康呢方面似乎較為失色,喺港股中
QQ主要透過旗下華誼騰訊娛樂(00419)涉足相關業務,而後者係醫療業務規模亦相當細
,上半年營業額只有唔夠五千萬銀。
*阿里巴巴一手中籤機率料高,買一手作長線部署*
阿臣仲留意到,阿里健康同平安好醫生(01833)喺港股入面,最具有互聯網醫療概念
嘅股份,前者雖然2019財年度蝕咗近8200萬人仔,但目前都已經反映晒業績唔太好嘅因
素,加上佢而家喺神州一線城市開展24小時急送藥服務,仲保證核心城區半個鐘內送達,再講
,神州老年人口愈嚟愈多,相信都會對送藥上門服務有好大需求,所以阿臣都睇好佢未來可以扭
虧。阿里健康將會喺下周二(26日)公布中期業績,而家股價處於橫行待變格局,一於買一手
博佢業績有驚喜,短線「他屐」先望9蚊,如果穿咗橫行區底部7﹒9銀,就應該要散水了。
至於阿里巴巴,阿臣睇到新聞都知,佢嘅國際配售提早咗截飛,而孖展就超額近五倍,即使
佢嘅招股反應唔錯,但抽一手中嘅機率都會相當高,所以阿臣決定抽一手作長線部署,一手
100股,入場費約18989元。
另外,瑞聲(02018)呢幾日愈升愈有,今日暫時最高去到58﹒5銀,阿臣覺得新「
唉瘋」咁賣得,加上就到感恩節、聖誕節、「雙12」同農曆新年,一於繼續揸住唔放,博佢有
力挑戰今年高位62﹒52銀。至於倉裏面嘅其他股票,就暫時按兵不動。
表列截至11月20日(11:30am止)阿臣投資組合表現:
股份 股數 平均買入價(元) 現價(元) 總值(元)
----------------------------------------
港股:
金界 2000股 9﹒65 14﹒44 28880
煤氣 1000股 16﹒00 15﹒08 15080
SPDR金ETF 10股 1097﹒00 1088﹒00 10880
瑞聲科技 500股 48﹒50 58﹒10 29050
平安好醫生 500股 52﹒90 59﹒85 29925
阿里健康 2000股 8﹒17 8﹒17 16340
----------------------------------------
股票市值 : 130155元
認購新股資金 : 約18989元
剩餘現金 : 約23797元
組合淨值 :約172941元
組合本月收益表現: +5﹒1%(截至上月底止組合淨值:164671元)
組合累計收益表現: +64﹒8%(本金105000元計)(2016年8月開倉)
*數據截至今日11:30am
【與拍賣官看藝術】常玉作品屢創天價,背後其實藏著跌宕起伏的人生► 即睇