按盤價 
《魚缸博客》自從華晨中國（０１１１４）早幾年因為股權問題搞到一鍋粥之後，公司股價
都因為大市問題而未有起色，不過華晨今日終於叻返次！集團上周四收市後公布，截至２０２３
年１２月３１日止全年純利７７﹒３５億元人民幣，按年升８﹒２％；每股基本盈利
１﹒５３３１２元人民幣，該公司董事會考慮批准派發特別股息。
考慮派特息就梗係開心仔，派多派少都係派。貴為「瀋陽市最大納稅大戶」，華晨寶馬係去
年總產量有７２﹒８萬架，算係一個唔錯數字。除左傳統油車賣得之外，其實寶馬算係繼
Ｔｅｓｌａ之後，比較早一批投資電動車嘅廠商，所以個堆「ｉ系」電動車都有市場。
內地人好興結婚「買車買樓」，而如果有能力的話，唔係買Ｂｅｎｚ就係買寶馬，品牌效應
下相信面對內地車企降價都有一定競爭力。
睇睇大行點講，花旗表示，預測該公司今年將宣派每股１元基本股息以及２元特別股息，即
２０２４年預計派息每股３元。展望２０２５及２０２６年，該行預期華晨派息比率可達５０％
，股息預測為０﹒７２元及０﹒６８元，相應將目標價從３﹒３５元升至９﹒３８元，預期可持
續經常性股息率為７﹒６％，認為風險回報水平合理，維持「買入╱高風險」評級。
未來幾年都有息派咁開心？而家股價先七蚊咁上下，對比起歷史高位仲有大把水位，如果而
家唔買都唔知真係等幾時，建議現價買入一注，如果跌穿七蚊可以考慮溝貨，但如果失守５﹒３
就考慮止蝕啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
WoW WoW星期三：健康網購產品低至$99 (只限今天)► 火速行動
