按盤價 
《魚缸博客》今日魚缸悶悶哋，先升後回，臨近中午收市倒跌幾十點，但幅度不大。早段睇
到大唐發電（００９９１）升近８％，以為自己睇錯，無啦啦升咁多，真係好少見。成交金額亦
唔係少，開市個幾鐘已經有成四千萬元成交。唔通有咩好消息？但左查右查，都唔見有任何消息
公布。再睇返電力股個板塊，有幾個同行都升得唔錯。或者係純屬炒作，又或者係有咩消息未公
布。
講起呢隻股票，其實，我早年都對佢有興趣，記得金融海嘯前，佢嘅股價有幾年升得唔錯，
而且印象中，以前嘅派息都唔差。更重要嘅係覺得電力股穩穩陣陣，唔會差得去邊。莫講話內地
過去十幾年經濟騰飛，對電力需求有增無減，就算香港接近飽和嘅電力市場，本地電力股一樣靠
得住，單係食息都可以跑贏通脹。點知，原來呢個諗法唔適合所有電力股。
過去３年，大唐電力嘅營收無錯係年年有增長，但係就年年錄得虧損。初初以為係特殊項目
或者個別原因，期望第二年會好返。點知呢幾年虧損成為常態，年年都有非控股權益同其他項目
虧損或減值。無論呢啲非控股權益係咩嘢，其他項目又係咩嘢。只要虧損成為常態，係咩嘢已經
唔重要。所以，近期都好少留意佢。
睇返大唐發電股價日線圖，走勢其實唔算差，純粹炒作嘅話，或者有機會上到１﹒８０元。
講得話炒作，大家當然要自己小心睇位。如果承受唔到風險嘅，香港同內地都有其他穩陣嘅電力
股可供選擇，起碼買完之後唔使瞓唔著。電力股都有風險？係呀，睇返大唐發電２００７年高峰
期，股價高見８﹒５１元（已除淨），相對於今日的１﹒４８銀，跌成咁，算唔算係風險？
（ｖｓ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
【母親節限時優惠】 送價值$288維柏健30天逆轉肌齡(膠原蛋白+生物素) ► 火速行動
