富仔上次講完電力股係時候嚟料,呢排升得唔錯,潤電(00836)短線總算到咗目標,攞番啲銀再買過其他股票。
另外有幾隻股票都同佢講住掰掰先:
泡泡瑪特(09992)因應多個城市又準備收緊防控措施,見股價升到39銀左右後唔係好夠力再上,索性全數沽出獲利先。
京東(09618)喺260銀樓上有好大阻力,加上呢排科技股環境唔太好,騰訊(00700)已經畀大股東逐步減持套現,一層疊一層,好易火燒連環船,全數沽出食胡先。
港鐵(00066)同中鐵(00390)擺咗一排,走勢上無乜起色,中鐵今日更加整咗支大陰燭,連續幾日上唔番100天線,實在唔對路,再唔止蝕真係輸鑊甘,兩隻股票都全數離場。
*國泰初步目標9.1銀*
今日富仔加入三隻股票,先講國泰(00293)先。雖然香港疫情近排都keep住每日過千單確診,但近幾日走勢似乎無再升得咁急。而且,國泰早前已經急住請番啲舊伙記番嚟,並打算喺2022年尾將飛行地點加倍至約60個,有意為嚟緊通關做好準備。瑞信預計,國泰客乘量喺今年同出年將達至疫情前嘅10%及80%,並喺2024年達到103%,相信會維持逐步復甦,上調集團今年同出年嘅盈利預測58%同15%,目標價亦由7.3銀升到8銀。
富仔另一個關注嘅係油價問題,事關依家全球蘊釀緊對經濟衰退嘅不安情緒,對油價點都有一定打擊,油組又未知幾時同點樣增產,加上早排實在升得太癲,短期應該要回下先。油價跌咗,相信會令國泰嘅燃料成本降低,對公司負擔減少,加上客運狀況有望逐步回復正常,都可以憧憬下。
喺日線圖上,國泰由6月17日低位7.5銀回升,到8.7銀水平有啲阻力,今日再跟住魚缸回調,但收市仲浪得住喺10天線上面,9RSI都回番啲。富仔已經喺8.25銀買入4000股,初步目標睇舊年6月10號大陰燭嘅高位9.1銀水平,到價會沽3000股,最後1000股就睇長啲,望到2019年嘅反彈高位12銀左右。止蝕位方面,國泰股價過去多次連續幾日跌穿100天線後有排都番唔到家鄉,富仔覺得100天線係國泰嘅最後防線,收市失守7.6銀就離場。
*小鵬下半季開車?*
跟住就係小鵬(09868)。雖然未如理想(02015)同蔚來(09866)發布新車,但6月交付咗15295架電動車,按年增長133%,按月亦增長51%。今年第二季度總交付34422架電動車,喺中國造車新勢力品牌裏面,連續第四次季度交付排第一,表現非常好。瑞信就話,小鵬第二季交付量略高於公司指引嘅3.1萬至3.4萬架車,並預期今年全年交付量按年升83%到18萬輛,維持小鵬美股「跑贏大市」評級。
富仔下半季特別留意汽車股,因為佢受阿爺嘅「恩惠」實在太多喇,減乘用車購置稅、汽車下鄉等一系列政策出台,希望谷多啲人舊車換新車。乘聯會亦預期,6月汽車行業銷量完成244.7萬架,按年增長20.9%,加埋復工復產效應下,汽車股下半年有望繼續開車。
小鵬喺造車新勢力當中,賣車情況同品牌效應唔錯,早排股價跟住車股開行turbo踩上去,由78銀升到142.8銀,升勢非常誇張。股價呢排只係回咗些少,呢幾日更加浪喺20天線以上,仲要今日跌市下,小鵬只係跌少少,而現水平同年內高位142.8銀比較仍然值博。富仔喺121銀買咗1000股,短線目標142銀左右,到價會沽800股,再上望睇160銀,止蝕位定喺100天線110銀水平。
*港交所有力重上400銀*
最後一隻係港交所(00388)。早排中證監同香港證監會批准將ETF納入互聯互通機制,即係「ETF通」。瑞銀就估計ETF通對港交所收入可能帶嚟1%以內嘅增長,但相信未來某個時候的嘅潛在擴張,會成為下一個關鍵催化劑,目標價由475銀調高1.05%到480銀。美銀就話,除咗ETF通出台之外,見唔到阿爺有新政策支持,但隨住阿爺收緊海外上市,加上舊年下半年基數較低,香港IPO規模會喺今年下半年回升。
富仔覺得近一、兩年好多新股暗盤表現都麻麻哋,只不過,中概股喺美國除牌有排搞,加上依家處於去全球化,中概股回流機會都好大,港交所CEO歐冠昇亦相信更多美股中概股,將改喺香港做第一上市。呢排又多番啲新股上市,好似快狗打車(02246)、智雲健康(09955)、塗鴉智能(02391)等,拖咗好耐嘅中國中免上市計劃亦預計喺今年第三季展開,港交所相信仲有唔錯潛力。
喺日線圖上,港交所股價上星期一(6月27日)衝到404.2銀後回落,但今日收市守得住20天線,而股價5月尾升破20天線後沿該線反覆上升。目前10、20同50天線都向上,保力加通道未有收窄,富仔喺20天線約365銀買咗700股,短線目標400銀左右,到價沽500股,最後200股就望430銀左右,收低於20天線則短線止蝕。
沽出之股份及盈虧
股份 | 股數 | 平均買入價(元) | 平均賣價(元) | 盈虧(元) |
---|---|---|---|---|
潤電 (00836) | 6000股 | 14.48 | 17.10 | 15720 |
泡泡瑪特 (09992) | 4000股 | 34.00 | 39.00 | 20000 |
京東 (09618) | 500股 | 241.00 | 265.00 | 12000 |
港鐵 (00066) | 2000股 | 42.00 | 41.00 | -2000 |
中國中鐵 (00390) | 5000股 | 5.40 | 5.00 | -2000 |
套現:498100元
模擬投資組合(原有股票)
股份 | 股數 | 平均買入價(元) | 現價(元) | 總值(元) |
---|---|---|---|---|
電盈 (00008) | 10000股 | 4.03 | 4.22 | 42200 |
領展 (00823) | 1000股 | 62.50 | 64.40 | 64400 |
信義玻璃 (00868) | 4000股 | 19.14 | 17.86 | 71440 |
微創機器人 (02252) | 500股 | 23.50 | 43.45 | 21725 |
康方生物 (09926) | 1000股 | 16.50 | 27.10 | 27100 |
模擬投資組合(新增股票)
股份 | 股數 | 平均買入價(元) | 現價(元) | 總值(元) |
---|---|---|---|---|
國泰 (00293) | 4000股 | 8.25 | 8.29 | 33160 |
港交所 (00388) | 700股 | 365.00 | 367.80 | 257460 |
小鵬 (09868) | 1000股 | 121.00 | 125.00 | 125000 |
股票市值 : 642485元
剩餘現金 : 334510元
組合淨值 : 976995元
* 數據截至7月6日收市
全新節目《說說心理話》青少年不可以戀愛!?真實個案講述驚心動魄經歷► 即睇