《魚缸博客》美國終於插手，油價呢鋪仲唔起飛？

　　又話考慮兩個禮拜，點知突然打你個措手不及？講緊就係美國終於出手，幫以色列轟炸伊朗，外間所謂「第六次中東戰爭」全面爆發。

　　博客個FACEBOOK真係好忙，好多人都想同博客「辯論」一下呢場戰爭，博客就認為，自己既不是阿拉伯人，又唔係猶太人，根本無咩資格評論；但從經濟、商業角度講下，都仲可以。

　　特朗普稱呢次轟炸係「出其不意」，不過唔知佢係咪真係考慮清楚？上一次伊拉克戰爭打左20幾年，又話有「大殺傷力武器」，點知屁都搵唔到一個，最後仲浪費左幾萬億軍費；之後美國撤出伊拉克，ISIS又大反擊，即係晒左20年、錢又用左，到頭來都係得個吉。

　　所以博客認為，美國打贏伊朗唔難，但打贏之後點扶植先係最難，用伊拉克個例子去講，真係「扶不起的阿斗」。

　　不過打唔打贏都唔緊要，最起碼油價又要起飛。伊朗而家話關閉霍爾木茲海峽，呢個關口作為全球20%石油同天然氣運輸的咽喉要道，其中2024年通過該海峽的石油中，有超過八成運往亞洲，而中國係最大買家之一；不過美國國務卿魯比奧就係霍士新聞台節目上敦促中國，勸說伊朗不要關閉霍爾木茲海峽。

　　講到尾，所謂「伊朗問題是中東人的，但油價卻是全世界的」，除非你兩個禮拜就打完呢場戰爭，否則國際油價又推到110蚊一桶，加埋美國之前因為貿易關稅戰、俄烏戰爭遺留嘅輸入性通脹問題，美國人自己企得穩先？

　　唔理啦，反正油價就係咁升，油股呢啲FREE MONEY，唔係唔買下話？

《編者按》本欄搜羅即市傳聞，惟消息未經證實，《經濟通》亦不保證內容之準確性。