《古臣周記－古臣》比特幣重上８０００美金關口，嚟緊仲有得升？

　　華為事件持續發酵，繼上星期五（１７日）花旗國列貿易黑名單之後，谷歌亦嚟多腳話要中止同華為業務合作，即係話華為以後嘅手機可能會立即失去更新Ａｎｄｒｏｉｄ操作系統嘅權限，而華為推出嘅新手機亦將無法使用Ｐｌａｙ　Ｓｔｏｒｅ。消息令到相關嘅手機設備股同５Ｇ股連日下瀉。雖然現時最新消息係相關禁令會有９０日緩衝期，不過封殺一事似乎仍然會陸續有嚟。而唔睇個股，睇魚缸走勢都同樣走樣！不足一個月已經唔見二千點仲穿埋二萬八呢個重要支持位，未來可能仲有排跌？不過，睇返恒指ＲＳＩ現時都去到超賣區嘅位置，可能都有得彈些少掛？
　
＊比特幣上望１００００美金？＊
　　
　　股市跌，港紙人仔亦跌，就連金價都唔係幾企得穩。不過，缸友可能唔知近排有一樣投資工具就一直保持強勢，講緊嘅係上年跌到一仆一碌跌瀉八成三嘅比特幣（ｂｉｔｃｏｉｎ），佢唔聲唔聲，由今年至今已經升逾一倍，升幅跑贏晒所有資產價格，星期一（２０日）嘅時候佢就曾經上過８０００美金大關，高見８０１９美金，升幅咁勁當然令「孖屐」近日再重新關注佢嘅投資價值。
　　今輪比特幣急漲，有指係同資金避險情緒有關，其中有分析就話人仔最近嘅走勢疲弱，加上即將「穿七」令資金加速外流，都係一個原因令比特幣成為一種另類受追捧嘅工具。睇好比特幣嘅前大摩分析師Ｔｏｍ　Ｌｅｅ四月嗰陣就講到比特幣升上２００天平均線之後，可能仲可以上埋一萬美金嘅位置，去到下年仲有可能再創歷史新高。佢認為，委內瑞拉同土耳其等國家嘅貨幣價值持續下跌，令當地人對傳統貨幣失去信心，轉投使用比特幣。亦有分析話，比特幣走勢同聯儲局加息與否有關，今年局方態度「轉鴿」嘅時候亦係一個令到比特幣上漲嘅原因。
　　不過，有人唱好當然都有唱淡，好似摩通咁，佢就話比特幣可能要回軟到４０００美金嘅位置，理由係比特幣內在價值同開採成本有關，價值最終要回歸開採成本。而佢就計到現時比特幣嘅邊際成本係４３００美金，以現價接近８０００美金去睇，兩者嘅差距係一年多以嚟最大，並接近２０１７年跌市前嘅水平。所以佢認為比特幣將要收窄返兩者差距而下跌。

＊栢能「挖礦」概念只宜小注＊

　　阿臣本身就無投資比特幣，不過就睇咗啲有關佢嘅資料，發覺佢大升大跌都唔係第一次。歷史數據睇到喺比特幣接近十年歷史入邊跌幅多過三成嘅有１２次，而跌幅超過七成亦有六次，當中包括上年嘅一次。但如果計及九年升幅就達４０萬倍，所以難怪大家對佢咁著迷！但老土都要學電視廣告咁話，比特幣潛在風險唔細，想買佢嘅缸友如果要入貨，真係要量力而為，ｓｅｔ好止蝕價最重要！
　　講多句，現時魚缸相關嘅概念股有做顯卡嘅栢能（０１２６３），佢同ＮＶＩＤＩＡ及ＡＭＤ兩間全球主要圖像處理器供應商都有合作關係，受惠於比特幣熱潮，２０１７年佢嘅盈利曾經增長超過一倍！當中由於「比特幣挖礦」需要功能性較強嘅顯示卡，且相當消耗顯示卡，所以有利栢能業務擴張。但睇睇上年佢份成績可以話認真麻麻，盈利減少１８﹒５巴仙有２﹒７１億。不過隨住比特幣今年初至今急漲，栢能嚟緊中期嘅成績應該都唔差掛？睇公仔圖走勢就相當麻麻，想買入嘅缸友可能小注買好啲，暫時睇佢回落返到一月低位１﹒５５銀先入手。
　　
＊買入日清及加注逆向ＥＴＦ＊
　　
　　講返阿臣個倉，金界（０３９１８）之前連９銀到１０銀嘅橫行區都穿埋，現時計計數，帳面唔見２５２０銀，但阿臣仍然諗住坐到中期即大概兩個月後先再作打算。
　　至於另一隻逆向ＥＴＦ就帳面有賺。上個星期五魚缸穿二萬八關之後，阿臣喺５﹒４銀嘅位置再買入３０００股，如果之後恒指有反彈可能再入多手，而渣打（０２８８８）走勢就繼續牛皮。之前阿臣講過會買入日清（０１４７５），就趁佢星期一急回到十天線（約４﹒６３９銀）嘅時候買入，現時睇睇呢幾個星期可唔可以重上上年高位５﹒２２７銀嘅位置。
　
　　表列截至５月２２日（１１：００ａｍ止）投資組合表現：
　　
　　股份　　　　　　股數　　　　　平均買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　金界　　　　　４０００股　　　９﹒６５元　　　　　９﹒０２元　　　　３６０８０元
　　ＦＩ南方恒指　４０００股　　　５﹒３１元　　　　　５﹒４５元　　　　２１８００元
　　渣打　　　　　　２５０股　　６７﹒５０元　　　　６８﹒６０元　　　　１７１５０元
　　日清　　　　　５０００股　　　４﹒６４元　　　　　４﹒９３元　　　　２４６５０元
　　－－－－－－－－－－－－－－－－－－－－－－－－－－－－－－－－－－－－－－－－
　　一周買入╱賣出股份
　　－－－－－－－－－－－－－－－－－－－－－－－－－－－－－－－－－－－－－－－－
　　股份　　　　　　每股作價　　　　數量　　　　計及手續費後金額　　　　　盈╱虧
　　　　　　　　　　　　　　　　　　　　　　　　　　　　　　　　　　　（不計手續費）
　　－－－－－－－－－－－－－－－－－－－－－－－－－－－－－－－－－－－－－－－－
　　買入：
　　ＦＩ南方恒指　　５﹒４０元　　３０００股　　　　１６２１９元　　　　　－－
　　日清　　　　　　４﹒６４元　　５０００股　　　　２３２４３元　　　　　－－
　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　　　　：　９９６８０元
　　剩餘現金　　　　：　４６１５８元
　　組合淨值　　　　：１４５８３８元
　　組合本月收益表現：－　０﹒１８％（截至上月底止組合淨值：１４６１０４元）
　　組合累計收益表現：＋３８﹒８９％（本金１０５０００元計）（２０１６年８月開倉）
　
　　＊數據截至今日１１：００ａｍ