香江魚缸未能「七翻身」，勢估唔到，８月份開局跌到阿媽都唔認得，四日累插千八點，中美貿易戰炮火愈來愈激，加上香江政局不穩，大價股細價股跌跌跌，投資者沽沽沽。依家市勢未穩，阿臣個倉呢個星期不敢輕舉妄動，暫時抱著Ｃａｓｈ ｉｓ Ｋｉｎｇ信條，保留彈藥，等機會先撈貨。
＊解開公司合股拆股大迷思＊
阿臣觀察到，孖屐「跌跌不休」，就會有好多上市公司「合股」。通常要搞合股嘅公司，都喺因為佢哋嘅股價太低，股票發行數目太多，做成行政上嘅支出龐大。就好似近排科地農業（０８１５３）就話要將每４０股合併成１股，原本有２５００億股面值０﹒０４仙嘅股份，但合併咗之後就得返６２﹒５億股面值０﹒０１６銀。通常上市公司合股，大多都以兩種原因去解釋。一就喺根據上市規則，公司嘅價位唔可以低於１仙，其二就喺減輕行政工作和行政費用。但實質上，公司喺唔想股價太難睇，就以科地農業為例，如果佢嘅一手交易單位合股前後不變，一樣喺５０００股，當佢依家股價喺２仙，即只要１００銀就可以買到一手，有機會仲平過手續費。而當佢合股之後，由現價２仙就會理論上變成８亳子之後，買一手就等於要畀４０００銀。股份由「仙股」變「毫子股」，公司形象都會好Ｄ！
科地農業（０８１５３） 價位 每手交易金額（不含手續費）
－－－－－－－－－－－－－－－－－－－－－－－－－－－－－－－－－－－
合股前 ０﹒０２０元 １００銀
合股後 ０﹒８００元 ４０００銀
－－－－－－－－－－－－－－－－－－－－－－－－－－－－－－－－－－－
通常搞合股嘅公司，都係一啲細價股，而當佢公布合股時，股價往往暴瀉，就好似科地喺
７月８日公布合股，翌日股價隨即暴瀉逾１７巴仙，之後公司股價會喺合股正式生效前後大幅波動，持股者真係要食定驚風散。
上市公司合股對投資者而言未係最慘，最慘就係合股後公布供股！就好似南華金融
（００６１９）咁，上年１１月搞股份５０合１後，到今年７月初公布２股供３股，供股價４２仙。供股喺指上市公司發行新增股票，等現有股東去認購，股東可按其持股比例認購，即南華金融原有股東手持每２股舊股，就可以有權去供３股新股，如果股東唔參與供股，佢嘅權益就會被攤薄，無錢供嘅股東真係面對兩難局面。
當然，上市公司可以「合完又供，供完又合」，遇到呢啲循環嘅情況，投資者最好都喺早早甩手啦！
＊合股後供股，缸友叫怕怕＊
相對合股，股份拆細主要係一啲股價比較大嘅公司，拆細後投資入場費無咁高，缸友買入時嘅資金壓力無咁大。近期香江股份拆細嘅例子唔多見，但中概股就有。阿里巴巴傳聞佢９月會嚟香江上市，佢最近公布股份「一拆八」方案，將普通股嘅數量將由目前嘅４０億股擴大至３２０億股，令拆細後嘅股價按比例調低，就可以降低每手入場費，吸引更多缸友有能力買貨，間接改善市場流通量。
大家不時見到一隻股份，分為「新」同「舊」交易顯示，當中有Ｄ同合股同拆細有關！當上市公司進行股份合併或分拆嘅時候，一般都會有特別嘅安排，例如喺某啲日子會有一個臨時櫃位編號，等持貨嘅缸友可以趁呢個機會，以現有股票形式買賣，好似計劃四合一嘅中國透雲
（０１３３２），合股後每手維持１００００股，下周一（１２日）合股生效，以每手買賣單位２５００股合併股份買賣（以舊有股票形式）嘅臨時櫃位同日開通，直至９月１３日收市，而以每手買賣單位１００００股合併股份（以新股票形式）原有櫃位８月２６日重開，故合併股份（以新股票及舊有股票形式）並行買賣會維持約三個星期。
股份合併或拆細生效時，以至喺原有櫃位重開或臨時櫃位關閉前，股價常見波動，缸友真係要打醒十二分精神啦！
表列短期內進行合股嘅上市公司：
上市公司（編號） 生效
－－－－－－－－－－－－－－－－－－－－－－－－－－－－－－
中國透雲 （０１３３２） 四合一 １２／０８
亞洲能源 （００３５１） 五合一 １９／０８
萬德金融 （０８１６３） 十合一 １９／０８
大灣區投資（００２６１） 二十合一 ２１／０８
羅馬集團 （０８０７２） 二十合一 ２２／０８
蒙焦煤企 （００９７５） 十合一 ２６／０８
科地農業 （０８１５３） 四十合一 ２６／０８
中海重工 （００６５１） 四十合一 ２８／０８
卡姆丹克 （００７１２） 四合一 ２８／０８
新煮意 （０８１７９） 十合一 ０２／０９
五龍電動車（００７２９） 二十合一 ０５／０９
－－－－－－－－－－－－－－－－－－－－－－－－－－－－－－
表列截至８月７日（１１：１５ａｍ止）阿臣投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ２０００股 ９﹒６５元 １１﹒１６元 ２２３２０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ２２３２０元
剩餘現金 ：１３６２５０元
組合淨值 ：１５８５７０元
組合本月收益表現： －０﹒５５％（截至上月底止組合淨值：１５９４４４元）
組合累計收益表現：＋５１﹒０２％（本金１０５０００元計）（２０１６年８月開倉）
＊數據截至今日１１：１５ａｍ
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
