近排「孖屐」喺咁尋底，缸友只可炒吓消息。阿爺之前公布大力支持深圳建設神州特色社會主義先行示範區，相關嘅深圳概念股即刻炒起。缸友炒得咁興奮都唔想停，但有無諗過有Ｄ熱炒股，其實同深圳先行區喺無咩關係呢？今日阿臣就嚟講吓Ｄ熱炒股點樣喺度扮豬食老虎！
首先，等阿臣簡單講吓幾個阿爺發布先行區發展嘅重點：
１﹒科技方面：阿爺話會以深圳為重點國家科學中心，支持深圳建設５Ｇ、人工智能、網絡空間科學與技術、生命信息與生物醫藥實驗室等嘅創新載體。阿爺同時有指明支持，喺深圳開展數字貨幣研究同移動支付嘅創新應用。
２﹒建設、物流方面：阿爺話要深圳快Ｄ起個全球海洋中心城市、海洋大學同國家深海科考中心，仲話要搞埋個國際海洋開發銀行。另外，阿爺仲想推動國際郵輪港建設，進一步增加國際班輪航線，探索研究簡化郵輪、遊艇及旅客出入境手續。
３﹒房地產方面：阿爺就講得比較虛，大概話要建立完善房地產市場平穩健康發展長效機制，同加快完善保障性住房與人才住房制度。
＊炒股消息講得美麗，業務同政策關係或不大＊
物流方面，近排就有好多缸友鍾意炒深圳國際（００１５２），佢主要業務喺收費公路同物流基建。除此之外，佢仲有同萬科（０２２０２）合作搞房地產，不過暫時只得兩個項目。睇返阿爺喺物流方面重點喺想搞全球海洋中心城市，而深圳國際嘅業務都喺高速公路收費，好似同阿爺講嘅重點範圍唔太一樣。今次短炒完一輪之後，股價會唔會再升，都喺要睇返佢自己本身嘅業務做得好唔好。
阿爺喺房地產方面就講得仲ｈｅａ，重點大概都喺會發展大灣區嘅樓。不過，唔同區就一定有唔同嘅樓價，而大灣區足足有９個區，仲未分邊Ｄ喺市中心會值錢Ｄ。阿臣就覺得剩喺香江嘅樓價喺唔同區都可以差天共地，如果缸友唔熟個區，就唔好亂買住，尤其依家好多內房股都強調自己有喺大灣區發展。咁點先知邊Ｄ內房前景明唔明朗呢？缸友可以從呢幾方面入手，一，睇吓佢有幾多土地儲備喺深圳呢Ｄ重點地區，二，有幾多開發同銷售住宅嘅項目進行中；三，佢持有幾多住宅、商舖、寫字樓同酒店嘅出租。Ｃｈｅｃｋ真Ｄ佢實質做緊嘅業務同佢做緊嘅野喺咪同深圳先行嘅政策有直接關係，唔好一見到有深圳同大灣區發展就狗衝！
＊炒股要炒穩，密切留意阿爺公布政策細節＊
阿爺喺講金融科技方面就最靠譜，就好似佢強調要搞好深圳嘅５Ｇ、人工智能同移動支付等等。深圳搞５Ｇ嘅話，中電信（００７２８）就一定直接受惠，皆因佢正正就喺負責５Ｇ基站嘅公司；而移動支付之中嘅大佬就一定喺騰訊（００７００）旗下嘅微信支付，相信政策對佢日後嘅股價都會有升值。另外，平保（０２３１８）旗下都有好多搞緊金融科技同醫療科技業務，好似金融壹賬通、平安好房同壹錢包等等，都值得缸友關注吓。
由於依家阿爺對於先行區講嘅嘢都仲好空泛，如果想炒深圳股嘅缸友嚟近就要更加密切關注吓阿爺嘅政策，唔好見到深圳就盲炒。
講返個阿臣個倉。阿臣上個禮拜四（２２號）「如願」喺１６蚊買入一手煤氣（００００３），之後個價係咁跌，暫時帳面蝕緊約半成，暫時無咩好怕。煤氣業務穩定，而魚缸仲係向淡尋底，公用股避險作用遲早浮返出嚟。呢個星期阿臣仍然按兵不動。
表列截至８月２８日（１１：１５ａｍ止）阿臣投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ２０００股 ９﹒６５元 １０﹒８６元 ２１７２０元
煤氣 １０００股 １６﹒００元 １５﹒２２元 １５２２０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ３６９８０元
剩餘現金 ：１２０１７８元
組合淨值 ：１５７１５８元
組合本月收益表現： －１﹒４％（截至上月底止組合淨值：１５９４４４元）
組合累計收益表現：＋４９﹒７％（本金１０５０００元計）（２０１６年８月開倉）
＊數據截至今日１１：１５ａｍ
【與拍賣官看藝術】常玉作品屢創天價，背後其實藏著跌宕起伏的人生► 即睇
