一年一度嘅「五一」黃金周即將來到，經過幾個月嘅防疫封閉措施，神州嘅疫情慢慢受控，相信唔少被困咗好幾個月嘅神州人都忍唔著要出去「放風」。據神州旅行研究院統計，之前清明節小長假境內遊嘅總接待人數就有４３００萬人次，因此有推測就話，今年「五一」黃金周出遊人數有機會達到１億人次。以往「黃金周」嘅概念一般都可以帶動濠賭、鐵鳥同旅遊相關板塊，不過今年情況咁特別，唔知五一概念仲有無得炒？要炒嘅話又應該點揀？避開咩股？
＊十年來最長嘅「五一」黃金周＊
新冠疫情嚴重影響神州市民嘅日常活動，全國亦整整停擺咗成兩個月，今年首季經濟更錄得史上首次負增長。為咗谷內需，阿爺今次「五一」費盡腦力，東拼西湊為神州人安排咗一個十年來最長嘅「五一」黃金周，足足有五日咁多，去個境內遊都綽綽有餘。
此外，為咗促進旅遊達成恢復經濟嘅目標，各地政府亦都加把勁，例如江蘇、重慶、福建、浙江及廣東等十幾個省市就出台「２﹒５日小長假」，仲未計有超過廿幾個省市貼錢俾民眾去旅行，講緊嘅就係浙江湖州、江蘇常州等地發放旅遊消費券。根據攜程發布嘅《２０２０「五一」旅遊消費新趨勢大數據預測報告》顯示，截至４月中旬，今年「五一」黃金周交通出行量將按月大增３５３％，出行總人次增加２８２％。
＊「預約制」出遊吼實同程藝龍及美團＊
有長假期固然好，但有唔少人都會擔心出遊導致人群集聚會新冠疫情出現第二波，所以今次假期同以前瀟灑嘅說走就走不一樣，神州文旅部聯合衛健委要求所有景區要建立完善預約制度，推行分時段遊覽。除咗預約之外，有點景區仲要求每日接待遊客唔可以超過最大承載量嘅３０巴仙，即係你如果無提前預約購票就好大機會要吃閉門羹。
今次小長假「預約制」出遊成為新趨勢，喺到阿臣就覺得不妨可以吼一下有做景點門票預約嘅同程藝龍（００７８０）及美團（０３６９０）。據同程旅行數據顯示，目前平台已有近５０００家景區可以實現在線預約入園；另外新晉嘅美團表現都唔差，有６６巴仙嘅５Ａ景區可以通過美團「閃入園」平台功能隨時購票，目前「閃入園」已覆蓋神州３００幾個城市約２７００個景區，仲可以提供餐飲美食票以及導遊講解產品等服務。
從上年嘅業績睇同程藝龍及美團。同程藝龍目前主要業務係自交通票務及預訂住宿，分別佔６１巴仙及３２巴仙。其中，上年住宿預訂服務營業收入４５﹒１８億人仔，按年增加２８﹒８巴仙。而美團方面，因為到店、酒店及旅遊業務係新開拓嘅業務，僅佔總收入嘅２３巴仙，但發展迅速。上年到店、酒店及旅遊業務收入就有２２２﹒７５億人仔按年大增４０巴仙，而業務嘅毛利率有成８９巴仙。相信今次「預約制」潮會幫佢地帶來一定刺激。
＊省內遊係主角，鐵鳥或炒不起＊
雖然神州嘅疫情已經有所控制，但係據數據分析顯示，「五一」假期境內低風險地區嘅周邊遊預訂較為活躍，而目前人氣最旺嘅城市有上海、廣州、深圳、成都、杭州、南京。因為長時間喺好似飛機、長途巴士咁狹窄又封閉嘅空間內風險都係會存在，加上同往年一樣「五一」期間高速公路繼續免費，所以今次神州人出遊首選本地遊或可以自駕遊嘅地方。
攜程數據顯示，截止４月，攜程租車訂單已達去年同期７０％。換言之，今次「五一」黃金周對國內航線嘅需求仍然偏淡。近日，大行瑞信喺報告入面都提到，神州城市重開、限制政策解除、航班恢復都帶動載客量溫和改善，不過境內線票價仍然較弱，料４月份客量錄按年減少七成。
＊同程藝龍已炒起，美團現價阻力大＊
「孖屐」似乎對今次依個十年來最長嘅「五一」黃金周帶有好大期望，從同程藝龍及美團股價圖分析，同程藝龍由月初４日起就形成咗一條上升軌道，累計升幅有近２５巴仙，如果以星期一（２８日）收市價１３﹒１０銀計，佢同１月份嘅高位１４銀比較，現價水位已經不多，阿臣認為依隻股或者已經先炒起，不適宜高追。
而美團整個月嘅走勢同魚缸走勢相似，都喺９５銀至１００銀附近徘徊。如果睇長時間Ｄ，美團今次已經係第三次喺１００銀位置橫行，第一次係上年１２月創上市新高前，第二次則是高位回調後。因此，目前美團喺１００銀嘅阻力是相當大，或者可以憧憬一下「五一」黃金周正式出遊數據有驚喜，令佢機會突破橫行區。不過，同同程藝龍單一業務唔一樣，美團嘅旅遊業務毛利雖高，但佢主要業務仲係外賣，喺非常時期可以分散風險。但阿臣相信隨著神州疫情風險慢慢降低，旅遊業會持續回暖，長線都係睇好美團前景，若股價回落到９５銀可考慮吸納。
古臣倉本周繼續按兵不動。
表列截至４月２９日（上午１１：１５時止）阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １２４５﹒００ １２４５０
平安好醫生 ２００股 ５２﹒９０ １１１﹒７０ ２２３４０
阿里巴巴 １００股 １７６﹒００ １９７﹒２０ １９７２０
微盟集團 ２０００股 ４﹒５５ ５﹒８９ １１７８０
三一國際 ２０００股 ４﹒１１ ４﹒１２ ８２４０
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ７４５３０元
剩餘現金 ： １２７６２０元
組合淨值 ： ２０２１５０元
組合本月收益表現： ＋１１﹒１％（截至上月底止組合淨值：１８１９８７元）
組合累計收益表現： ＋９２﹒５％（本金１０５０００元計）（２０１６年８月開倉）
＊數據截至今日上午１１：１５ａｍ
【你點睇】的士記分制將於周末生效，你認為該制度可否幫助的士提升服務質素？► 立即投票
