自從新冠肺炎疫情喺３月底開始喺歐美蔓延，全球確診病例人數至今已經超過三百萬，全球經濟陷入衰退已毋庸置疑。踏入５月，正當大家都仲期待緊各國陸續解除封鎖措施，重啟經濟活動之時，花旗國侵侵又再為環球孖屐投下一枚震撼彈，威脅要向神州加徵關稅，聲稱有證據顯示武漢實驗室同呢次疫情有關，又指要懲罰神州處理疫情不力，導致疫情向全球蔓延。究竟貿易戰２﹒０開打嘅機會高唔高？之前啲貿易戰風眼股使唔使避一避風頭？
幫大家回憶一下，喺疫情爆發初期，侵侵曾經喺１月２４日發文，讚揚神州遏制疫情嘅努力同透明度。但根據《紐約時報》上月報道披露，華府早喺１月底收到專家提醒，疫情規模之大已經令人難以置信，情況亦只會變得愈來愈差，敦促相關部門為疫情做好準備。而侵侵喺２月仲斥責當地衛生專家危言聳聽，直至３月中先宣布全國實施社交距離措施。所以，侵侵呢個時候發動貿易戰，好明顯係為咗轉移視線，以掩飾當時輕視疫情嚴重性嘅過失。但阿臣認為，全面發動貿易戰嘅可能性唔大。
＊全球元氣大傷難再承受貿戰＊
首先，喺國家經濟層面上，發動貿易戰對各國嘅經濟造成嘅影響嚴重。１９３０年代花旗國大蕭條嘅原因之一就係同關稅有關。當時１９２９年花旗國孖屐突然崩盤，政府為咗遏止失業同維護農民嘅利益，就制定關稅，結果遭到其他國家加關稅報復。結果到１９３３年花旗國嘅進出口大減六成，令大蕭條延續。花旗國ＣＮＮ指出，依家實行關稅及制裁措施，只會適得其反，令目前嘅「嚴重衰退」變成「全面蕭條」。
花旗國將公布失業數據，其中預期至於失業率將飆升至雙位數，並升至１９４８年以來最高。喺大家仲完全未從３月股災、疫情重創全球經濟嘅局面回氣，侵侵呢個時候要全面實施關稅戰，恐怕係攞花旗國嘅經濟前景來較飛。
＊企業不會從神州遷離生產線＊
第二，多年來面對神州崛起，侵侵一上場已經急於「去神州化」，今次趁疫情席捲神州仲唔召返喺神州設廠嘅花旗國企業？但實際上又可唔可行呢？根據神州花旗國商會喺今年３月做嘅調查顯示，九成六喺神州嘅花旗國嘅企業認為，供應鏈將會喺半年內恢復正常，無意轉移生產線或者取消喺神州嘅發展項目。
有份做呢次調查嘅普華永道合夥人尼古拉斯表示，大多數企業關心嘅係當下復工情況，而唔係地緣政治；有四成受訪企業反映未來３至５年喺神州嘅供應鏈規劃唔會因這次疫情而改變，但亦有五成二嘅企業認為言之尚早。其實喺舊年中美開打貿易戰期間，花旗國商界就反對向神州加徵關稅，認為關稅會嚴重打擊當地企業。
＊去神州化、去全球化代價大＊
不過，除咗花旗國之外，呢次疫情亦牽動全球多國，所以亦有群起圍堵神州嘅憂慮。但如果歐美各國藉今次疫情達到「去神州化」，代價亦唔細，即係失去全球化帶來嘅好處包括承受更高嘅生產成本，同時失去神州１４億人嘅消費孖屐。而且有分析指，結果全球都去全球化，作為國際貨幣嘅美金都失去咗重要性，各國減少美金儲備，到時花旗國恐難以贖返其他國家嘅美金。
就咁睇落，侵侵發動貿易戰嘅預期效果都幾難達到，仲未計神州到時反擊帶來更大嘅不明確性。而上月神州駐花旗國大使崔天凱指，即使喺疫情下仍會努力落實中美首階段貿易協議。相信只要神州唔喺貿易協議上反口，阿臣認為花旗國再掀起貿易戰２﹒０嘅可能性唔大。
所以，啲貿易戰風眼股包括手機設備佬，或者之前被花旗國制裁嘅中資企業，以及阿臣倉內嘅中概股阿里巴巴（０９９８８），阿臣都唔太擔心佢地會因此受影響，但就要密切留意全球經濟復甦進展對佢地嘅影響。
古臣持倉本周繼續按兵不動。
表列截至５月６日（上午１１：１５時止）阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １２４２﹒００ １２４２０
平安好醫生 ２００股 ５２﹒９０ １０４﹒６０ ２０９２０
阿里巴巴 １００股 １７６﹒００ １９３﹒５０ １９３５０
微盟集團 ２０００股 ４﹒５５ ５﹒９２ １１８４０
三一國際 ２０００股 ４﹒１１ ４﹒００ ８０００
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ７２５３０元
剩餘現金 ： １２７６２０元
組合淨值 ： ２００１５０元
組合本月收益表現： － ０﹒６％（截至上月底止組合淨值：２０１２７０元）
組合累計收益表現： ＋９０﹒６％（本金１０５０００元計）（２０１６年８月開倉）
＊數據截至今日上午１１：１５ａｍ
【與拍賣官看藝術】常玉作品屢創天價，背後其實藏著跌宕起伏的人生► 即睇
