近期「孖屐」口味出現大轉變,因為不斷出現正面嘅疫苗消息,見花旗金走弱,同埋花旗國十年期國債收益率維持上升趨勢,見資金開始買翻唔少舊經濟佬好似銀行佬、航運佬、航空佬、保險佬等等,反映風險胃納增加。但古臣就發現仲有個舊經濟板塊比較落後,就係建材水泥佬啦,阿臣就睇好仲有水位炒!
*水泥佬可部署中建材*
神州前日(16日)公布全國水泥產量24100萬噸,按年增長9﹒6巴仙。1-10月份,全國水泥產量191988萬噸,同比增長0﹒4巴仙。另外,摩通最近出報告話,鋼鐵、玻璃及鋁庫存下降反映咗強勁嘅基本需求。由於第四季係水泥傳統旺季,而且固定資產投資、房地產銷量及汽車/新能源汽車生產嘅表現健康,相信直至農曆新年嘅需求會繼續強勁,而庫存減少速度會有所加快。
咁水泥股又選擇邊隻好呢?阿臣會揀中建材(03323),首先公司業績穩定,首九個月業績營業總收入1817﹒73億元人民幣,按年微降0﹒8巴仙,但淨利潤116﹒26億元人民幣,增長11﹒8巴仙。而公司中期淨利潤按年減少,反映公司第三季業績復甦,當中毛利率近年亦穩步上揚。另一方面,公司近期有資產重組事項,相信完成後可以令公司較輕身,更迎合市場口味。最後一點,中建材較潤泥(01313)及海螺(00914)更具爆發力同好炒,所以阿臣比較鍾意!
*中移動中長線仍然有值搏率*
最近花旗國總統侵侵動作多多,上星期五(13日)簽行政命令,話禁止任何花旗國人士投資有解放軍北京公司,當中電信佬在列,搞到中移動(00941)、中聯通(00762)同中電信(00728)好似倒水咁,齊齊去翻「疫情底」。阿臣就覺得吼位買些少搏反彈都唔錯!
首先,中移動呢類電信佬主要業務普遍於神州做,花旗國投資者唔買佢嘅股票其實唔會影響公司基本面同現金流。大家仲記唔記得當年中興(00763)被花旗國制裁後,股價短期曾大跌超過六成。但後來公司受惠5G國策於去年回升,仲曾經埋破頂。所以,只要基本面無問題,呢啲「Event driven」嘅東西只係常見嘅小波動,仲有機會吸引到花旗國以外嘅投資者趁低吸納都未定!睇翻中移動,當公司PB(市帳率)跌到約0﹒77倍,股息率亦超過6厘,相信吼位反彈,甚至中長線些少Hold住有值搏率。
*買中移動咪心急*
古臣唔係依家叫大家即刻衝去買,要再留意「孖屐」資金動向,因為短期相信仲有沽壓。高盛近期發表研究報告,上述行政命令可能令MSCI指數公司降低相關股份比重,或將受花旗國投資禁令影響嘅中資股剔出旗下指數。以中移動為例,高盛估計潛在被動流出資金有41億花旗金;潛在主動流出資金105﹒06億花旗金。有見及此,建議大家留意住中移動走勢,但咪急,企穩48﹒6銀幾日再追貨都未遲!
表列截至11月18日早上11時15分阿臣投資組合表現:
股份 股數 平均買入價(元) 現價(元) 總值(元)
--------------------------------------
港股:
SPDR金ETF 10股 1097﹒00 1365﹒0 13650
平安好醫生 200股 52﹒90 103﹒8 20760
阿里巴巴 200股 210﹒50 247﹒6 49520
港交所 100股 264﹒50 370﹒4 37040
寶尊電商 100股 82﹒90 104﹒7 10470
九龍倉置業 2000股 32﹒00 39﹒4 78800
京東集團 50股 306﹒00 339﹒4 16970
--------------------------------------
股票市值 : 227210元
剩餘現金 : 21064元
組合淨值 : 248274元
組合本月收益表現: +5﹒9%(截至上月底止組合淨值:234544元)
組合累計收益表現: +136﹒5%(本金105000元計)(2016年8月開倉)
*數據截至11月18日早上11時
【與拍賣官看藝術】常玉作品屢創天價,背後其實藏著跌宕起伏的人生► 即睇