魚缸呢期窄幅上落,悶到無朋友,不過醫療股呢期炒得咁燦爛,明顯見到有資金喺入面搞作。魚缸市底其實唔差,大型藍戰士唔炒唔緊要,最緊要中小型股有炒作!當中阿臣見到有一隻醫療器械股有爆發潛力,就喺心通醫療(02160)。
*TAVI發展潛力大屬醫療行業藍海*
經導管主動脈瓣置換術(TAVI)於2002年首次應用於臨床,技術原理係通過使用導向管植入人工主動脈瓣,技術估計未來十年將大幅應用喺主動脈瓣狹窄患者上,因為侵入性較細、手術風險低、創傷小、住院時間較短且恢復較快,喺臨床實踐中最受推薦嘅方法,估計TAVI手術普及性未來大增,成為醫療器械行業發展嘅其中一片藍海。
弗若斯特沙利文預計,2019至2025年神州市場將以53﹒1巴仙嘅年複合增長率快速擴容,2025年市場規模有望達到50﹒6億美金。所以,TAVI適應症喺神州未來大把機會大展拳腳。
*心通醫療核心產品增長及質素具優勢*
國產品牌方面,神州進入商業化階段嘅主要TAVI產品嘅品牌包括心通醫療、啟明醫療(02500)、傑成醫療、愛德華生命科學,當中以心通醫療及啟明醫療係神州品牌主要玩家,故主要以此兩品牌作比較。
心通醫療核心產品為VitaFlow。雖然去年年頭開始受新冠疫情影響,相關手術量必然下降,但去年銷量仲可以有1293套,按年大增3﹒77倍,反映行業對產品需求殷切及對品牌嘅信心,更可憧憬疫後積壓手術陸續進行,產品持續放量。惟啟明醫療較之放緩,去年其核心產品VenusA-Valve收入約2﹒72億人仔,僅升17﹒2巴仙。
心通醫療產品質素領先同行。VitaFlow喺目前商業化TAVI產品裡唯一一款具有電動輸送系統嘅產品,從而提高手術成功率嘅亦有助於減少醫生嘅學習時間。另外,VitaFlow亦係神州上市產品中首款使用牛心包作為瓣膜組織嘅產品。牛心包好處喺減少血流造成嘅瓣損壞,而牛心包佔有全球TAVI市場55巴仙以上嘅份額,以及全球幾乎全部外科主動脈瓣膜置換術(SAVR)市場,居於主導地位。價錢方面,去年公司VitaFlow平均售價為8萬銀(人仔.下同)左右,較啟明醫療嘅19﹒6萬銀便宜。
根據弗若斯特沙利文報告,臨床試驗方面,VitaFlow喺全因死亡率及術後併發症(包括中度/重度瓣周漏、嚴重卒中和血管併發症)方面表現極出色,例如全因死亡率在出院時和植入後在30天死亡率僅0﹒9%;1年及2年死亡率分別為2﹒70%及4﹒50%,數據目前為國內已商業化產品同類最佳。故此,阿臣認為公司嘅產品目前在國內喺最具競爭力,性能最卓越。
假設VitaFlowII今年順利獲批商業化,出廠價仿照前一代VitaFlow約8萬銀定價,加上明年於歐洲成功獲批商業化,料公司毛利率隨銷售規模擴大增,甚至加快公司虧轉盈速度。
*擁有母公司微創醫療銷售優勢*
心通醫療具備強大母公司優勢,其為微創醫療(00853)子公司,微創為國內最大綜合性醫療器械創新企業,銷售管道豐富,海內外超過80個國家和地區銷售,全球覆蓋醫院超過一萬家。產品可透過母公司嘅銷售管道於海外發展。
近期醫療器械股普遍由大牛股變身為大熊股,全因神州集採政策拖累,但大家唔使憂心住,因為TAVI行業尚處於萌芽階段,加上屬創新器材,估計神州當局會繼續重點扶持發展,短期盈利估計較少機會被政策拖低,預期可以繼續跑贏大市。
*高增長股不宜只參考估值買賣*
根據彭博綜合預測,2021至2024年收入分別為3﹒06億、6﹒1億、9﹒32億及13﹒85億。2021至2024年盈虧分別為-7633萬、8130萬、2﹒04億、3﹒4億。以噚日(27日)收市價16﹒74銀計算,2022年市盈率約400倍,估值確實較高。惟買入創新醫療器械公司,大家主要聚焦其潛在增長速度、產品放量情況,加上憧憬產品市佔率大增,故此估值現時並非買入嘅主要參考要素,建議以中長線投資為目標。
以技術圖表去望,建議調整至16銀可吸納,目標價先望前頂約21銀,惟連續兩日收穿14銀止蝕。
目前阿臣個倉維持不變,有賺有輸,心通醫療到價先買!
表列截至4月28日中午12時阿臣投資組合表現:
股份 股數 平均買入價(元) 現價(元) 總值(元)
--------------------------------------
港股:
港交所 100股 264﹒50 494﹒40元 49440
九龍倉置業 2000股 32﹒00 45﹒15元 90300
京東集團 100股 335﹒60 308﹒60元 30860
中金公司 2000股 18﹒22 19﹒30元 38600
郵儲行 2000股 6﹒10 5﹒17元 10340
融創中國 1000股 32﹒80 30﹒55元 30550
--------------------------------------
股票市值 : 250090元
剩餘現金 : 17459元
組合淨值 : 267549元
組合本月收益表現: +0﹒9%(截至上月底止組合淨值:265149元)
組合累計收益表現:+154﹒8%(本金105000元計)(2016年8月開倉)
*數據截至4月28日中午12時
【你點睇】本港主要銀行跟隨美聯儲減息,你對樓市前景有否信心?► 立即投票