《炒股戰記－施富》短炒博美團，夏日飲潤啤！

　　兩個星期又過喇，同大家update下個倉先：
　　信義玻璃(00868)行咗一排都無乜起色，7月11日更加整咗支大陰燭，走勢每況愈下，資金暫時未炒到光伏股住，富仔喺17.1銀平倉，約10%嘅損失都未算好嚴重。
　　小鵬(09868)走勢同樣轉差，依家畀條10天線頂到實一實，近日更加失守埋50同100天線，富仔要嚴守止蝕，喺110銀沽晒所有貨。雖然小鵬長遠前景唔會太差，但依家魚缸繼續「炒股唔炒市」，如果有啲股票突然轉弱，都要快啲離場先，等啱時機再入貨。近排汽車股明顯轉弱，富仔會過多排先再吼過。
　
*美團短線望210銀*

　　今日富仔加入兩隻股票。第一隻係美團(03690)。早排北京為咗加快全市餐飲消費回暖，決定發放「重逢美好」餐飲消費券，由政府同提供餐飲類服務嘅平台企業共同出資，推出外賣類、到店類、養老助殘類三種消費券，累計1億元。美團當然有份喇，集團數據顯示，北京餐飲消費券上線只係6分鐘，平台上四種面額餐飲消費券已經全部畀人攞晒，當中公司餐飲堂食滿100減30人仔嘅消費券，只係68秒就搶晒。
　　另外，美團喺第二季收入帶動下，預計虧損會收窄到11億人仔，出年更有可能再度實現轉虧為盈。有大行睇好美團第二季嘅收入情況，例如花旗就預期總收入會按年升13.2%到495億人仔，亦認為美團受惠餐廳逐步重開同假日期間嘅強勁需求，維持「買入」評級，目標價更加由222銀升到225銀，升幅有1.4%。
　　股價走勢嚟講，美團7月12日喺100天線附近有支持，股價開始回升，去到今日已經重上20天線，而100天線開始拗上去，走勢比騰訊(00700)同阿里巴巴(09988)好。北水近幾日都不斷買美團，有資金支持下，仍值得短炒。富仔喺188銀買咗700股，短線目標留意6月9日嘅反彈高位210銀左右，到價會沽500股，剩低200股就睇230銀，跌穿175銀就止蝕。

*潤啤料整固待破*

　　第二隻係潤啤(00291)。潤啤舊年全年營業額按年升6.2%，到333.9億人仔，股東應佔溢利亦按年大幅增加1.2倍到45.9億銀，主要因為近年採用高端戰略，令集團業務有唔錯增長。
　　值得留意嘅係，潤啤上半年喺高檔次以上啤酒銷量按年增長50.9%，其中「喜力」、「勇闖天涯superX」等銷量增幅按年更加有雙位數增長。集團又喺年內推出多個新品牌，其中「醴」同「黑獅果啤」都走高端路線。富仔覺得潤啤逐步邁向高端化市場，除咗可以提高市場份額，亦可以帶動產品平均價格上升，對集團收益有唔錯幫助。
　　高盛對潤啤前景樂觀，認為內地消費市場年底或明年初會好轉，並從行業了解，5月下半月生意開始改善。該行睇好市佔提升、定價能力好同增強成本結構嘅公司，其中一間就係潤啤喇。依家夏日炎炎，係啤酒股嘅旺季，相信對潤啤嘅銷量有幫助。
　　日線圖上，潤啤由6月尾高位59銀回落，但股價現時處整固階段，由5月初展開嘅上升軌仲未受到破壞。近期股價喺51銀有支持，並喺10同20天線之間上落，而保力加通道底部上升緊，走勢上估計整固待破。富仔喺52銀買咗6000股，短線目標58銀，到價沽4000股，剩底2000股留意64銀，跌穿50天線就止蝕。
　
　　　　　　　　　　　　　　　　 　 沽出之股份及盈虧