嚟到9月中，魚缸唔好講話20000，19000都好難上得番。即使已經跌到咁上下，成交平均嚟講仍然好弱，北水又無乜流入嚟，成個「孖屐」好灰呀！
當然，灰到咁都唔係無原因嘅。美國近幾日不斷傳出會簽署行政命令嘅消息，內容針對中國嘅芯片同生物科技行業。「美國優先」嘅口號再次抬頭，中方當然極為不滿啦，意味中美互相制裁嘅戰火未有熄滅，成個「孖屐」又點可能唔灰呢？
另一樣搞到好灰嘅，亦都同美國有關。美國公布嘅8月CPI按年升幅8.3%，核心CPI就按年升6.3%，大過預期。本來以為通脹見頂，聯儲局未必會咁「鷹」啦，CPI數據一出，又可能畀聯儲局一個「放鷹」嘅藉口，結果令「孖屐」好懊惱！不過，睇埋個PPI點樣先，但今個月無100%，都應該有90%機會加息0.75厘喇。本來有希望，最後變失望，你話點可能唔灰呀……！
始終全球經濟環境疲弱，個個都無乜心機炒股；內房危機未緩和，個個都無晒信心買樓。依家魚缸仲要面對唔少大風大浪，下行趨勢未有顯著轉變，已經去到月中，睇怕好難上得番250個月移動平均線，下試18825呢關，都應該走唔甩。一波未平，一波又起，唔知呢種「灰」幾時先有轉變呢？
*國泰股價走勢穩定*
講下個倉先，自從爆出「股神」減持比亞迪(01211)嘅消息後，車股回調幅度非常誇張。「蔚小理」8月汽車交付量成績又唔理想，加上魚缸仍然唔畀力，車股回調仲可能會有一段時間。作為車股之一嘅耐世特(01316)，成個8月份走勢幾弱，近幾日條100天線叫做撐得住，如果連5銀呢條最後防線都失守埋，富仔會沽埋手上持貨。
另外，國泰(00293)就受惠於逐步放寬嘅入境檢疫政策，股價9月初喺100天線即見支持，以近期嘅環境嚟講，佢嘅走勢算幾穩定。當然，香港疫情又有爆發跡象，嚟緊政府會唔會再收緊防疫措施，對國泰影響都唔細，富仔會望到實疫情消息，有咩風吹草動，到時再算！
模擬投資組合(原有持股)
| 股份 | 股數 | 平均買入價(元) | 現價(元) | 總值(元) |
|---|---|---|---|---|
| 電盈 (00008) | 3000股 | 4.03 | 3.90 | 11700 |
| 領展 (00823) | 1000股 | 62.50 | 61.40 | 61400 |
| 康方生物 (09926) | 1000股 | 16.50 | 24.10 | 24100 |
| 國泰 (00293) | 4000股 | 8.25 | 8.59 | 34360 |
| 潤啤 (00291) | 2000股 | 52.00 | 52.95 | 105900 |
| 鄭煤機 (00564) | 2000股 | 10.20 | 9.83 | 19660 |
| 耐世特 (01316) | 6000股 | 6.30 | 5.40 | 32400 |
股票市值 : 289520元
剩餘現金 : 657140元
組合淨值 : 946660元
* 數據截至9月14日收市
etnet榮獲HKEX Awards 2023 「最佳表現證券數據供應商」大獎► 了解詳情
