《炒股戰記－施富》中遠海能股價走勢強，攜程炒通關仲有得上？

　　今次富仔再加兩隻股票，一隻係航運股中遠海能(01138)，另一隻係通關概念股之一嘅攜程(09961)，希望可以喺依家咁弱嘅市況搵番啲啦！
　　講今日加入嘅股票之前，有三隻富仔之前買嘅股票要離場！鄭煤機(00564)同耐世特(01316)喺同一日買入，但兩隻股之後走勢不似預期，尤其耐世特失守100天線，跌穿之前定嘅止蝕位，最後決定將呢兩隻股票全數沽出以減少損失。另外，國泰(00293)因應入境檢疫措施逐步放寬，股價順勢而飛，上星期四(22日)已經到咗第一個目標位9銀水平，富仔喺9.2銀沽出3000股，最後1000股就睇12銀。
　
*中遠海能處整固階段*
　
　　早排波羅的海乾貨指數(BDI)曾創半月新高，航運股齊齊興奮。中遠海能喺9月21日大升超過10%。不過，攞同系嘅中遠海控(01919)，甚至藍籌股東方海外(00316)比較，中遠海能今年到依家已經升超過50%，走勢一個月比一個月強。
　　富仔覺得，中遠海能升得咁厲害，主要受惠於能源危機(真正有危自大機)。中遠海能從事原油、液化天然氣及化學品運輸，亦係少數有運送天然氣嘅船。俄烏戰爭持續，俄羅斯仍然未開番運往歐洲嘅主要天然氣管道「北溪一號」，歐洲面臨嚴峻嘅能源危機。仲有，好快又到冬天，歐洲對能源嘅需求殷切，種種因素加埋，都令中遠海能有唔錯優勢。
　　雖然中遠海能今年上半年嘅純利按年下跌69.5%到1.78億人民幣，但隨住歐洲能源危機醞釀當中，即使航運價格相信因為疫情回穩而有所下降，市場預期中遠海能出年盈利能夠番倍。
　　事實上，股價由2月開始反覆向上，呈一頂高過一頂形態。上星期四升到8.65銀後回落，但日線圖上嘅主要移動平均線仍然向上，股價年內喺20天線嘅支持力度都強，富仔覺得股價處於整固階段，今日進一步回落到20天線附近，係個唔錯嘅買入時機。富仔喺7銀買咗10000股，上望目標8.6銀，收市跌穿6銀就止蝕。
　
*攜程目標240銀*
　
　　至於攜程就係炒通關。香港政府今日開始，放寬海外或台灣經機場抵港人士檢疫安排，由「3+4」改為「0+3」，即取消酒店檢疫，改為家居或酒店3日醫學監測。
　　攜程旗下Trip.com公布，過去兩日(9月24及25日)，Trip.com(香港)出境航班訂單量比上星期同期增長近400%。至於入境趨勢，入境航班訂單量比上星期同期增長155%。可想而知，「0+3」嘅安排吸引唔少港人外遊，對攜程嚟講係一件好事。
　　攜程話，海外遊客或者需要更多時間消化「0+3」，雖然入境遊數據未如出境遊喺周末期間有咁大增幅，但仍然相信入境遊會喺今年第四季度錄得大幅增長。更何況，如果「0+3」措施實施後，疫情無再出現大幅度反彈，相信港府會再應業界人士要求，放寬到「0+0」，有利攜程喺航班預訂嘅業務。
　　喺日線圖，攜程股價自今年初開始橫行。依家市場仲炒緊「0+3」嘅消息，而近日攜程嘅成交額唔錯，有望突破橫行區。富仔喺210銀買咗500股，目標睇240銀，收市跌穿190銀止蝕。
　　　
　　沽出之股份及盈虧