《小傳日記》阿爺要買幾百架空巴，神州鐵鳥內鬥只會愈演愈烈！

　　小傳身邊有一個熱愛旅行嘅同事，單單喺今年上半年已經飛咗五轉，去勻成個東南亞咁滯！喺開始講正題之前，同大家分享一個買機票嘅慳錢大法，若果你放假時間比較充足嘅話，不妨留意下喺深圳或者廣州出發嘅機票。雖然部分內地航空公司嘅飛機設備相對比較舊啲，不過計埋搭高鐵返內地嘅票價，淡季可能隨時平過喺香港直飛其他目的地一倍有多。

　　講返正題喇！今朝小編一打開報紙，就見到大大隻字寫住「中國正考慮最早下月訂購數百架空中巴士飛機」，報道入面講到話，阿爺正喺度同航空公司傾潛在嘅訂單規模，數量將會介乎200至500架窄體同埋寬體飛機。唔知大家仲記唔記得，侵侵喺今年4月開打關稅戰之後，阿爺曾經一度嬲嬲豬拒絕接收波音飛機。據聞阿爺同侵侵發表日內瓦聯合聲明之後，就取消返接收波音飛機嘅禁令，不過呢個消息都仲係未被證實嘅，帶返個頭盔先。

　　市場分析話，今次阿爺咁高調考慮買入幾百架空中巴士，其實是向侵侵發出希望就貿易問題達成共識嘅訊號。老實講！小編就唔係政治專家，若果以乘客嘅角度嚟講，就當然係好事。除咗有得搭新飛機、享受更高服務質素之外；同一時間亦可以提升航空公司嘅實際新增飛機數量，多啲班次揀嘛。

　　大行高盛較早前發表研報講過，預計2025至2027年中國航空公司座位運力增長介乎2%至4%。若果今次阿爺同空中巴士嘅交易真係成事，而且阿爺又肯收返波音飛機嘅話，睇嚟日後座位運力增長就唔單單係上面呢個數喇！

　　不過呢，買飛機大刁對於東航(00670)、國航(00753)、南航(01055)等等嘅內地航空公司就未必係好事喇。神州民航業遲遲未迎來復甦期，三間港股上市嘅內地航空公司業績今年第一季都係錄得大幅虧損，股價表現似死水，原因就係在於神州經濟大環境下行，加上國內飛機票價對比高鐵缺乏吸引力，前排有一家神州航企幸福航空長期欠薪，導致機師衝上雲霄之餘，都仲要送外賣揸網約車補貼家用！喺呢個時候接收新飛機又要增加營運成本，航班供應增加又會影響機票價錢，都可以話幾危。

　　反觀香港，國泰(00293)舊年賺99億銀，業績勝預期（不過香港快運虧損有惡化跡象），開心到要向空中巴士訂150架飛機，包括窄體客機、區域廣體客機、大型貨機，喺未來幾年就會陸續完成交接。國泰雄心壯志搞擴張，但勢估唔到港人會開始北上搭飛機，如果趨勢持續，本地航空公司就要同神州鐵鳥「捲」埋一份喇，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。