「兩會」舉行市場憧憬有好利政策，加上中美貿易戰轉好，繼續帶動中港兩地魚缸氣氛，上證嗰邊仲上埋三千點大關，香江呢邊亦試過多上次重上二萬九千點，星期一（４日）最高見２９２４１點，見逾８個月新高，不過去到呢啲位，部分獲利盤湧現，二萬九暫時仍然無力企穩。其實，對比上次企穩二萬八用咗三個星期，要上二萬九缸友可能都要有耐性啲。
＊花旗國建房數據差＊
之前阿臣倉入邊隻潤電（００８３６），因為意外被剔出恒指成分股，股價一度大跌，暫時喺百天線（約１４﹒８１２銀）附近上落，不過今次阿臣唔係主力講潤電，反而想講下隻獲納入恒指嘅創科實業（００６６９）。
創科業務穩打穩紮，主要係製造及貿易再充電電動工具、地板護理產品、太陽能及電子產品、個人健康護理產品同廚房潔具。上年因為業務主要喺花旗國同歐洲嘅關係，股價喺上年１１月由５０銀嘅位置，試過跌到去３５銀左右，但隨住中美貿易戰同兩國關係轉好，加上爆冷成為恒指新貴，連帶股價都持續造好，升到接近歷史高位５５銀嘅位置。
其實，呢隻魚毛過去幾年盤數都唔差嫁，連續十年嘅純利都有雙位數字增長，其中最大嘅收益大多數嚟自電動工具業務，以最新一份業績去睇，相關收入佔咗總收入逾八成六，而且旗下有多個知名嘅品牌，支撐佢喺海外嘅業務。
既然講到創科係一隻依賴外國收益嘅魚毛，咁缸友都要留意外國建築同建房相關嘅數據。阿臣就見到花旗國喺呢方面嘅數據就麻麻，前晚花旗國國商務部就公布咗，１２月建築支出按月下降０﹒６巴仙，比預期升０﹒２巴仙為差；而且以全年計，建築開支亦創七年以嚟最細增幅，只增加４﹒１巴仙，此前曾經連續六年增長超過１０巴仙。花旗國再早啲公布嘅１２月新屋動工亦跌至逾兩年新低，按月大跌１１﹒２巴仙，遠超過市場預期嘅０﹒１巴仙，當中嘅主因係住戶建設下跌所致。不過，再睇埋噚晚公布嘅新屋銷售數據，就樓市未算完全放慢，上年１２月嘅新屋銷售按月升３﹒７巴仙，以年率計係６２﹒１萬間，比「孖屐」預期嘅６０萬間為多，亦係７個月新高。
＊創科今日派成績表＊
另外，缸友亦都可以留意下，美金嘅走勢，因為強美金，可以另創科喺採購原材料方面有匯率優勢，有利降低生產成本。
以現價嚟講，缸友如果想買呢條魚毛，不妨等埋今日公布業績，睇吓有無驚喜先再考慮，畢竟以現時市盈率約２６﹒５倍唔算平，不過由今次獲恒指公司納入藍籌，加埋中建材（０３３２３）獲納入國指指，可以睇到「舊經濟股」始終有佢嘅價值。
＊買多一手潤電博過＊
潤電被剔出恒指成分股，不過阿臣仍然對佢有信心，現時１４天ＲＳＩ同５天ＲＳＩ去到３６左右嘅水平，接近超賣，阿臣個倉現價買多一手博佢睇吓有無反彈，但如果之後跌穿１４銀嘅位置，咁阿臣就會走人了。
表列截至３月６日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
華潤電力 ２０００股 １５﹒９０元 １４﹒６６元 ２９３２０元
－－－－－－－－－－－－－－－－－－－－－－－－－－－－－－－－－－－－－－－－
一周買入╱賣出股份
－－－－－－－－－－－－－－－－－－－－－－－－－－－－－－－－－－－－－－－－
股份 每股作價 數量 計及手續費後金額 盈╱虧
（不計手續費）
－－－－－－－－－－－－－－－－－－－－－－－－－－－－－－－－－－－－－－－－
買入：
華潤電力 １４﹒６６元 ２０００股 ２９３７０元 －－
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ５８６４０元
剩餘現金 ： ９５９４０元
組合淨值 ：１５４５８０元
組合本月收益表現： － ０﹒３２％（截至上月底止組合淨值：１５５０７０元）
組合累計收益表現： ＋４７﹒２２％（本金１０５０００元計）（２０１６年８月開倉）
＊數據截至今日１１：００ａｍ
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
