踏入第二季無耐，香江魚缸就有個好消息！根據《彭博》嘅統計，上星期二（９日）魚缸市值已經達到５﹒７９萬億美金（約４５萬億銀），係自２０１５「港股大時代」以嚟首次超越日本，緊隨喺花旗國（市值３１﹒２８萬美金）同神州（市值７﹒６萬美金）之後，成為全球第三市值嘅「孖屐」，可喜可賀啊！
阿臣諗，日股長遠未見增長動力嚟睇，而香江仲有Ａ場呢個「孖屐」帶動下，魚缸應該仲有一段時間可以穩坐「老三」嘅位置。其實，香江唔單止喺市值上有進步，就連上一季嘅集資額都有唔錯嘅成績！今年第一季就有３７隻新股上市，集資額達２６億美金（約２０２﹒８億銀）係亞洲區內排行第一，喺全球排名第二，第一位仍然係花旗國嘅納斯達克，首季集資金額就有３３５億美金，跑贏晒第二至四名嘅集資額總和，勁啊！
綜合上季資額最高嘅公司係第七隻Ｂ股（無盈利生物科企）基石藥業（０２６１６），集資淨額係２０﹒７億銀，以招價價１２銀計，截至昨日累計升幅有近３２巴仙，都叫對得住一眾投資者啊。而到第二季，阿臣亦收到風，大型集資將會接踵而來，其中全球最大啤酒釀造公司百威英博（ＡＢ ＩｎＢｅｖ）會分拆佢喺亞洲嘅業務嚟魚缸上市，預計市值高達７００億美金（約５４６０億銀），集資５０億美金（約３９０億港元），有望成為今年最大型新股，睇下到時佢嘅招股價再決定認唔認購。
＊傳神州放寬股指期貨，生發發面臨競爭＊
香江今年市值同集資額齊齊有好成績，缸友可能都會心郁郁想買返些少「生發發」（００３８８），阿臣就覺得月供生發發的確係一個唔錯嘅選擇，但如果現時入手就唔太建議喇，畢竟以魚缸預期市盈率１１﹒３倍去睇，都已經係過去恒指７年嘅平均值，最近亦喺三萬點上上落落，短期似乎都仍然未有方向，現時買入值博率唔高。
另外，生發發早前去到２８６銀嘅高位，好大程度係因為同ＭＳＣＩ簽訂協議，將推出ＭＳＣＩ中國Ａ股指數期貨合約，但阿臣就留意到，「孖屐」傳中證監有意放寬股指期貨嘅交易限制，開放埋畀外資，同時擬允許社保基金、商業銀行、保險基金、國企、合格境外機構投資者（ＱＦＩＩ）同人民幣合格境外機構投資者（ＲＱＦＩＩ）參與期貨「孖屐」，令原本生發發嘅半獨市生意變得有競爭。
再者，其實深交所喺第一季集資額亦緊隨香江之後，以１６億美金排亞洲第二位，如果日後再加埋創科板嘅成立，以未來前景去睇，滬深「孖屐」喺業務競爭上不容忽視啊！
魚缸近排都喺三萬點唔上唔落，根據過去香江前兩次收復整數關口嘅經驗，都有近５００至８００點嘅回調，所以阿臣諗港股短期或者會先下試廿天線（約２９５００點）嘅位置，想短炒生發發嘅缸友或者就先等魚缸回調到相關位置先考慮細細注買入。
＊Ｎａｇａ３融資釋疑慮，買多一手金界＊
講返阿臣個倉，金界（０３９１８）喺今個星期升到１０銀嘅位置，令阿臣之前博反彈嘅政策成功。今個星期佢亦釋除一眾小股東對早前發展Ｎａｇａ３嘅憂慮。
金界公布Ｎａｇａ３總開發成本會係３５億美金，其中５０巴仙由內部資金撥付，淨低５０巴仙由控股股東兼行政總裁曾立強提供。當項目完成同全面投入營運之後，金界就再以每股１２銀發行逾１１﹒４２億股新股支付畀大股東。
現時預計Ｎａｇａ３會喺２０２５年完成。除返開每年大概支付２﹒９億美金，足夠應付到派息嘅支出，亦唔會喺項目建築期間需要有利息支出，而且阿臣諗以呢個方法解決融資嘅難題，變相大股東係咪間接增持金界？睇到大股東對佢前景咁有信心，所以阿臣喺星期一（１５日）開市嘅時候就先買多手。阿臣預計金界短期可以收復所有主要平均線，到時再買或沽再作打算。
表列截至４月１７日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ４０００股 ９﹒６５元 １０﹒１０元 ４０４００元
ＦＩ南方恒指 １０００股 ５﹒０５元 ５﹒０５元 ５０５０元
－－－－－－－－－－－－－－－－－－－－－－－－－－－－－－－－－－－－－－－－
一周買入╱賣出股份
－－－－－－－－－－－－－－－－－－－－－－－－－－－－－－－－－－－－－－－－
股份 每股作價 數量 計及手續費後金額 盈╱虧
（不計手續費）
－－－－－－－－－－－－－－－－－－－－－－－－－－－－－－－－－－－－－－－－
買入：
金界 ９﹒８０元 ２０００股 １９６３９元 －－
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ４５４５０元
剩餘現金 ：１０１６４４元
組合淨值 ：１４７０９４元
組合本月收益表現： ＋１﹒１７％（截至上月底止組合淨值：１４５３８９元）
組合累計收益表現： ＋４０﹒０９％（本金１０５０００元計）（２０１６年８月開倉）
＊數據截至今日１１：００ａｍ
【你點睇】的士記分制將於周末生效，你認為該制度可否幫助的士提升服務質素？► 立即投票
