《古臣周記－古臣》金價自６年高位回軟，黃金股點部署好？

　　「習特會」過後，中美之前嘅緊張關係一下子就緩和，全球各地嘅魚缸當然升一升賀一賀佢。不過，神州以至環球最新一份製造業ＰＭＩ走樣，未能合符「孖屐」預期，所以香江呢兩日返嚟都唔敢升得咁急，似乎要上返二萬九呢個關口，好友仲要加把勁。
　　「孖屐」風險胃納擴大，之前一直成為資金避難所嘅黃金，其價格自然就要回落返啲，有分析就話，現時金價喺某啲技術位至為關鍵，如果守到固然升勢持續，但失守就要再試低位，所以呢個星期阿臣就講一啲黃金股啦！

＊金礦股業績參差，金股首選ＳＰＤＲ金ＥＴＦ＊　
　　
　　現貨金自突破１４００美金關口之後，之前曾經一舉上漲升到逾六年高位見１４３８﹒６３美金，升到咁急除咗因為中美貿易戰為經濟前景帶來不穩，仲受地緣政治風險影響，之前美伊兩國就差啲開戰。另外，當然都同「孖屐」預期聯儲局今個月會減息有關。不過，隨住頭兩個因素已經緩和，加上儲局主席鮑叔叔（鮑威爾）早前已經為今個月減息預期降溫，隔晚現貨金已經回落到１４０５﹒５３美金。分析就話，如果金價之後跌穿１３５０美金嘅話，可能就要重回跌勢，所以呢個位缸友要睇緊啲啦。
　　黃金此前當炒，一啲金礦股已經跟升，好似招金（０１８１８）、紫金（０２８９９）同山東黃金（０１７８７）都有唔錯嘅升幅。不過，阿臣睇過佢地嘅基本面，雖然受惠金價，但同時亦受其他成本等因素影響，以紫金為例，業務除咗黃金之外，仲有其他金屬開採業務，好似銅、銀等，都會受有關價格浮動影響。再睇埋業績，其實三隻金礦佬成績都幾參差，其中招金成績最差，不論上年全年定今年首季都出現倒退，盈利分別跌２６巴仙同跌逾１巴仙。紫金上年全年就多賺近１７巴仙，但今年首季已經少賺１９巴仙。只有山東黃金今年首季純利仍然增長但只有約半成，所以缸友如果買咗啲金礦佬，就真係要就住嚟炒啊。
　　講返貿易戰，花旗國呢邊同神州關係略為緩和，不過就開始起對付歐盟，威脅對歐盟另外４０億美金商品加徵關稅，加上花旗國經濟數據走樣，啱啱上個月製造業活動數據放緩至近三年低位，所以「孖屐」避險情緒重臨，金價呢排走勢都幾反覆，但都無損投資者對黃金嘅需求。全球最大嘅黃金上市交易基金ＳＰＤＲ　Ｇｏｌｄ　Ｔｒｕｓｔ（０２８４０）嘅黃金持有量，截至周一（１日）數據，就升咗０﹒７８巴仙，至８００﹒２０噸，６月嘅持金量就亦上漲近７巴仙，唔睇專業投資者，睇全球央行對黃金嘅需求亦十分積極，截至今年四月底，根據世界黃金協會（ＷＧＣ）同國際貨幣基金組織（ＩＭＦ）資料顯示，各央行總黃金儲備３４０２４噸，當月淨買入量達４３噸，按月增長８巴仙；首４個月淨增購２０７噸，喺２０１０年以來同期最高。反映「孖屐」對黃金嘅需求有增無減。
　　中美關係時好時壞，加上阿臣覺得侵侵對鮑叔叔嘅態度，隨時成為一隻「黑天鵝」，後市走勢唔明朗下，缸友有閒錢，買少少黃金都係一個保險嘅選擇，不過金礦股阿臣覺得炒下短線就算數喇，如果真係中長線睇好金價，就不如買ＳＰＤＲ金ＥＴＦ（交易所買賣基金）更直接，一來佢交投量最大，本身亦係世界知名嘅黃金ＥＴＦ，對散戶嚟講如果要轉身都比較靈活。睇埋公仔圖，呢隻魚毛上個月走勢承住金價嘅走勢，幾個裂口上成為「金牛股」，最高見過１０５９銀係近七年高位，６月份單月升幅達８﹒７巴仙跑贏恒指。近排個勢都幾反覆，曾經落返去十天線嘅位置（約１０３１銀），今日又再因為金價反彈再上漲，缸友就睇下嚟緊會唔會回補返上個月上金牛股嘅裂口（約９９２至１０２０銀），如果之後喺呢啲位橫行，缸友咪小注買少少做長線投資囉！

＊渣打重上７０關口沽貨淨留金畀守倉＊
　　　
　　阿臣上星期五（２８日）為防Ｇ２０峰會嚟個反高潮，加上見到渣打（０２８８８）即使有回購，股價都無咩起色，所以就喺當日開市以７０﹒５銀先沽貨走人，不計手續費有７５０銀落袋。另一魚毛金界（０３９１８）已經上返買入價同百天線（約９﹒７６４銀），走勢唔差，所以就繼續坐到中期嘅策略，希望做到財息兼收。阿臣現時手頭資金充裕，所以想睇過一陣，恒指走勢會點走，先再部署買入其他魚毛，暫時只賣不買。

　　表列截至７月３日（１１：００ａｍ止）投資組合表現：
　
　　股份　　　　　　股數　　　　　平均買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　金界　　　　　４０００股　　　９﹒６５元　　　　　９﹒８７元　　　３９４８０元
　　－－－－－－－－－－－－－－－－－－－－－－－－－－－－－－－－－－－－－－－－
　　一周買入╱賣出股份
　　－－－－－－－－－－－－－－－－－－－－－－－－－－－－－－－－－－－－－－－－
　　股份　　　　　　　每股作價　　　　數量　　　　計及手續費後金額　　　　　盈╱虧
　　　　　　　　　　　　　　　　　　　　　　　　　　　　　　　　　　　（不計手續費）
　　－－－－－－－－－－－－－－－－－－－－－－－－－－－－－－－－－－－－－－－－
　　沽出：
　　渣打　　　　　７０﹒５０元　　　２５０股　　　　１７５８８元　　　　　７５０元
　　－－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　：　３９４８０元
　　剩餘現金　　　　：１１２５８１元
　　組合淨值　　　　：１５２０６１元
　　組合本月收益表現：＋　０﹒７９％（截至上月底止組合淨值：１５０８７０元）
　　組合累計收益表現：＋４４﹒８２％（本金１０５０００元計）（２０１６年８月開倉）
　
　　＊數據截至今日１１：００ａｍ