《小傳日記》飲唔郁喇！淘寶京東美團外賣大戰點解選中茶飲？

　　呢排茶飲行業真係熱鬧，香江有滬上阿姨(02589)上市，神州有主攻茶飲行業嘅外賣大戰，今日神州嘅微博有一條熱搜話「再咁落去奶茶超過五蚊人仔我都要諗過！」講嘅係今輪嘅外賣大戰。

　　大家都知，今年2月京東(09618)殺入外賣界，直接開出「百億補貼」計劃，包括「滿11減10」、「滿40減20」等優惠，庫迪咖啡最低3.9人仔杯、古茗亦低至4.8人仔。

　　淘寶（即係餓了麼）亦唔執輸，4月底將「小時達」升級做「閃購」，5月頭更誇張，出動直升機掛廣告全城宣傳，推出「奶茶免單1億杯」活動。每日3個時段搶「免單卡」同「請客卡」，搶到「請客卡」可以share畀friend一齊免費飲。

　　美團(03690)見勢唔對，即刻反擊推「千億補貼」，包攬正餐、飲品等多個品類，特別針對茶飲提供「瑞幸7.9人仔送到屋企」、「霸王茶姬23人仔兩杯」等優惠，仲針對星巴克等高端品牌推出「滿60減25」嘅代金券。之前嘅「美團神券膨脹」功能，平時最多膨脹到8人仔，而家竟然有14人仔！

　　外賣大戰十年前大家都見過一次喇，但點解今次點解轉咗玩奶茶呢？

　　奶茶本身就係一個「高頻低單價」嘅產品，成日有人笑話，呢啲嘢唔係為咗解渴，而係為咗解壓。你話一杯奶茶幾人仔到十幾人仔，平時可能覺得貴，但而家補貼後幾角幾人仔一杯，唔飲真係好蝕。仲有奶茶呢樣嘢，唔似正餐咁講究時間，你肚餓飲得、飽肚都飲得，辦公室開會飲、返屋企煲劇飲、同朋友傾計都飲，基本上唔使諗，隨時隨地都可以嚟一杯。

　　仲有一點，就係奶茶品牌嘅連鎖化率高。你睇庫迪、古茗、茶百道、霸王茶姬，隨便拎個品牌出嚟都係幾千幾萬間分店，外賣平台同佢哋傾咗補貼政策，就等於全國消費者都可以飲到優惠價奶茶，呢種規模效應係正餐冇得比嘅。

　　最後，奶茶仲有一樣特別之處，就係佢有社交屬性。飲奶茶唔係單純飲，仲有一種「犒賞自己」嘅感覺，或者送俾朋友一齊分享。平臺搞咩「請客卡」、「免單卡」，呢啲玩法就係利用咗奶茶嘅呢種特性，直接拉高消費者嘅參與感。

　　當年外賣大戰完結後，紅包縮水、運費翻倍，今次奶茶優惠都總有落幕一日。不過神州網民已經豁出去：「飲得一日得一日，血糖爆標再算！」話唔定下次戰略物資係檸檬茶，到時又睇住班平台點玩。請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。