《小傳日記》小紅書估值飆升傳魚缸上市，下一隻「金牛股」？

　　話咁快又到星期五，小傳又要諗下放假同女朋友去邊度玩。話說，小編由出世已經喺香港住，你講得出嘅所有景點都已經去過晒咁滯，每個禮拜要諗一個新地方拍拖你真係咪話唔頭痛。不過！好彩之前有內地朋友介紹用小紅書「探店」，由餐廳推介、小眾景點打卡、旅行部署都一應俱全，而家個個禮拜都發掘到有趣嘅新地方玩，都幾方便。

　　話晒呢度喺財經記者日記，當然唔係同大家分享感情生活啦。是咁的！今朝一打開電腦，第一篇彈出嚟嘅新聞就係「據報小紅書估值飆升至2000億港元，最快今年IPO上市」，《彭博》透過小紅書股東「金沙江創投」旗下基金嘅投資組合報告估計，小紅書而家嘅估值已經超過260億美元(折合超過2000億港元)，比起新冠疫情期間的200億元美元，估值升咗30%。

　　小紅書喺2013年創立，結合社群分享同電商購物於一身嘅社交平台，市場就曾經形容過佢係「中國版INSTAGRAM」，好多「家人們」會喺小紅書上面分享圖片、reels、文字筆記等等。小紅書最為人所知曉嘅風光偉績，咁當然係之前花旗國禁TikTok嗰陣啦，短短兩日已經有超過70萬個「TikTok難民」湧入去小紅書，喺美國市場嘅下載量更加按年增長超過兩倍。

　　其實小紅書之前已經有傳話會喺美國上市，後尾因為阿爺收緊對中概股嘅審計，最後就梗係無成事啦。不過市場依家估計，隨住估值急增，小紅書會加快腳步上市，最終目的地更加可能會係香江魚缸！港交所(00388)今鋪真係笑住賺，繼寧王(03750)、恒瑞(01276)等大型新股正式喺魚缸上市，之後又傳快時尚品牌SHEIN準備下半年過嚟上市，而家再有呢本估值唔細嘅「小紅書」，小傳真係要準備多啲彈藥買重港交所先得。

　　若小紅書真係喺魚缸上市成功，佢會唔會繼老鋪黃金(06181)之後，成為一隻受萬人追捧嘅「金牛股」呢？各位小傳粉絲又會唔會準備落場抽返幾手呀？請請！　

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。