《笑傲缸湖》盈盈仲讀緊U嗰陣,就聽聞過有人用學校電腦挖礦,仲要唔只用幾部,係用哂
成個電腦室嘅電腦!各位同學,就算要挖礦,偷人哋電嚟挖都係唔要得㗎,你挖到時就開心,但
係人哋電費都會好重皮。好似響大馬,就有被人偷電嘅公司嬲豬到要出壓路機嚟輾爛哂啲礦機。
話說馬來西亞婆羅洲警方,喺今年2至4月就做咗6次突擊行動,總共沒收咗1069部B
itcoin礦機,原來係同當地成日被人偷電挖礦嘅砂勞越州能源(Sarawak Ene
rgy)嘅合作行動。
盈盈就話鍾意儀式咁啫,估唔到嗰邊警方都啱呢味,特登將呢千幾部礦機一次過放哂響警察
總部前面嘅停車場,再call咗架蒸汽壓路機嚟碌碎哂佢哋!唔知砂勞越州能源睇到,條氣有
無順返啲呢?畢竟佢哋公司一路以嚟被人偷電挖礦就蝕咗200萬美金。
當地警察仲講到,因為呢批Bitcoin礦工亂咁駁電,已經令到3間屋著火燒燬。而呢
一輪狂風掃落葉嘅行動之後,而家當地嘅挖礦事業已經無哂咁濟。其實挖礦喺大馬唔係犯法,但
係嗰邊嘅電力法規都算全球數一數二嚴格,非法調整電力線路最高可以罰10萬馬幣㗎。
計盈盈話,其實而家挖Bitcoin挖勁耐都挖唔到一個,嘥電又嘥錢,邊有以前咁高效
益。個個國家都話要管制虛擬貨幣,挖礦仲係咪咁好搵呢?《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】本港主要銀行跟隨美聯儲減息,你對樓市前景有否信心?► 立即投票