RSS訂閱 咩到唔使做，「幾球嘢」輕鬆攞到？盈盈唔係講緊中六合彩呀！呢個故事講緊一個返夜更嘅神秘男子，點樣運用一個自動化程式，創造出完全唔使出力做嘢嘅賺錢大法，令打工仔女震驚嘅「最強蛇王法」誕生啦！
呢位叫做Cynicusme嘅網友喺社交平台Reddit到話，自己2015年開始做夜班資料輸入員，每日要將詳細訂單嘅email資料，入落去公司系統到。不過喺職前訓練嗰陣，佢知道原來呢份工係可以用「自動化取代」。為咗「方便」自己做嘢，佢不惜出兩個月糧，請專人幫佢開發呢個程式。
本身公司唔想加輪班期間嘅交通同清潔費開支，Cynicusme講到自己第一日開始就喺屋企做嘢。做呢份工嘅前兩年，佢會花少少時間，check下程式有無出問題，邊到要人為操作。所有嘢都ok，就由得電腦自己run，自己就喺呢段返工時間瞓覺，甚至出去玩同睇戲。日頭有其他工做嘅Cynicusme，變相係不費吹灰之力搵錢。
呢個自動化程式幫到Cynicusme好多，公司仲叫佢唔使做夜更，升做日更嘅職位。不過，佢話自己怕羞，啱做夜更工多啲，所以拒絕咗。不過都無所謂啦，佢唔止做咗部門嘅「最優秀員工」，加人工都加咗2次，5年嚟賺咗7萬美金(約54.6萬港紙)。
本來諗住繼續袋袋平安，點知公司用咗4年時間開發到取代自動化程式嘅軟件，最後畀咗Cynicusme遣散費。不過，公司畀佢攞走notebook同做嘢設備，仲歡迎佢申請任何想做嘅職位。
雖然時間係耐咗啲，但就咁繑埋雙手，一年就搵到10幾萬。呢種「最強蛇王法」，你很想要吧？《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
