《著數神算》雖然有云「慳得一蚊得一蚊」，但咪以為喺消費主義嘅社會中，畀錢一方注定
被動。其實，只要「畀錢畀得有策略、使錢使得有計劃、理財理得有條理」，著數自然一籮籮。
消費者最緊要識得遊戲規則，自然可以反客為主。本欄正是要點出「找窿路、搵著數」竅門，讓
大家每使一蚊，都體現出精明理財消費之本義。
今時今日，仲有幾多香港人ｓｈｏｐｐｉｎｇ堅持數銀紙呢，特別喺呢個超巿、麥記都接受
信用咭埋單嘅年頭。若有人堅持畀現金，對於數銀紙那份執著應值得我們去尊敬。對略有潔僻
（銀紙上充滿細菌），向來都「嫌錢腥」嘅筆者，基本上已全面轉用電子貨幣。
有人討厭信用咭，全因使用條款繁多，惟筆者則沉醉其中，最鍾意睇規則，一來保障自己，
另一方面若能喺條文中找到「著數」方法，那份滿足感非筆墨可形容。但點樣喺茫茫著數中任我
行？要善用、盡用信用卡著數才算真學問！
＊亂咁申請卡，信貸紀錄如印「黑豬仔」＊
筆者酷愛使用信用卡，或因「一卡傍身、世界通行」嘅概念自小就被灌輸入腦。但是，當年
筆者唔識得玩信用咭呢個遊戲，恃住有張糧單，亂咁申請信用卡，後來才知道鑄成大錯。
相信唔少卡主，大概喺信用卡申請表「畫押」時，唔會留意到銀行要求查閱申請人信貸紀錄
。本嚟翻開「數簿」明志，係平常不過嘅事情，但其實「魔鬼在細節」。
信貸資料庫發出嘅報告，大家可以睇成一份證明你過去財務紀錄嘅文件。信貸機構從你嘅
「底細」，去了解、考慮畀幾多信用額你。咁疑問嚟啦，申請信用卡唔係呃、唔係搶，只要有還
錢能力，銀行又使乜考慮咁多？此乃最「喱民」嘅謬誤。常有人誤會拖欠貸款、孭一身街數，先
會整花自己個紀錄，其實若短時間內，畀信貸機構狂翻記「數簿」，效果如同畀人印上「黑豬仔
」一樣。皆因短期內被多次「查數」，亦即暗示呢期你嘅財務唔對路，若銀行見到客仔短期內同
多家「錢莊」打招呼，難道唔驚客仔透支完閃人咩？又或者，錢莊會咁諗，客仔短期內開咁多張
咭，仲可簽幾多數呀？喺生意角度睇，呢個新客嘅ｖａｌｕｅ非常低。
當日筆者亂咁申請信用卡，雖然申請無一不批，但堂堂一張白金級嘅信用卡，信用額跌到得
番８０００蚊，真係情何以堪呢？
有前輩教路，若個人信貸資料庫被畫花晒，就連向錢莊借錢都成問題，若打算買樓，睇怕申
請按揭都凍過水。但孖屐就有個「不成文」規定，若半年內唔畀人翻帳多於３次，就可當你身家
清白。大家若果有意借貸買樓，未來半年最好忍忍手。簡言之，胡亂申請咭前應停一停、諗一諗
。
＊只要敢開聲「嫌貴」，銀行就唔收錢？＊
有日，筆者收到３間銀行嘅月結單，一望之下，竟然同時收取３張信用咭年費。３張都係白
金咭，年費每張千八銀，驚嚇程度比起唔多相熟嘅人送來嘅「紅色炸彈」更震撼，若一個唔覺意
埋單，大拿拿「半萬銀」就去如流水。
筆者即時搵任職信用咭中心客戶服務（ＣＳ）嘅巴打求救，點知佢淡淡然回答：「你打去熱
線，話想豁免年費，講完。」接通熱線，筆者即理直氣壯咁話想「唔畀錢」，獲得禮貌而滿意嘅
答應。誰知「沒有最順攤、只有更順攤」，打去獅子銀行信用咭熱線，同佢個電話系統玩一輪
「數字遊戲」後，竟然有出現一個「申請信用咭年費豁免」嘅選項，只要跟指示登記，就連一句
聲都唔使出就成功「回水」。你話係咪吊詭，既然有「豁免」嘅選項，點解仲要收年費呢？
「凱旋」回歸後，第一時間向ＣＳ巴打報喜，點知佢暗地裡同筆者講，話其實每間公司早有
套免年費嘅「潛規則」，坊間流傳嘅「免年費、保客仔」之說，確係真有其事，只要戶口無乜
「鑊氣」，豁免年費都好易話為。佢仲話，作為ＣＳ，日日聽一千幾百個電話，最討厭同客仔玩
「猜心」嘅遊戲，所以若客仔好聲好氣，直接提出要求，有位「走棧」自然好易話為。
巴打仲補充，銀行方對收年費睇得好開，話豁免年費就好比去街巿買菜搭條蔥一樣咁平常，
所以真係唔需要怕醜。佢以國泰ＡＥ普通咭為例，要求客仔每年簽十萬蚊單先免年費，但「潛規
則」若簽夠２﹒５萬銀，ＣＳ都有權幫你豁免。所以，若想慳返筆，就要主動開聲啦。
＊結婚擺酒簽帳，銀行送機票遊北海道？＊
有云「銀包咭位有限、信用咭無限」，出街消費配搭邊幾張咭最著數，可謂一門學問。但正
所謂「百咭配百客」，每種咭都有佢嘅ｓｅｌｌｉｎｇ ｐｏｉｎｔ，主要選取考慮是各張咭嘅
特點，包括：儲積分、聯營優惠、飲食著數、現金回贈等，精選「啱身」嘅咭跟身先算精明。
近年最ｈｉｔ嘅咭，大概都係儲飛行里數。事關從前高不可攀嘅遊戲，今日嘅規則已變平民
化。想當年每簽１５蚊（甚至廿蚊）單先賺一飛行里數，點知而家玩殺價，有銀行做到簽６蚊就
儲到，亦即話簽帳１２萬銀就可去台灣，簽單１８萬銀就去日本。換句話說，分分鐘結婚擺酒連
使費簽帳，信用咭公司已ｓｐｏｎｓｏｒ機票畀你去北海道渡蜜月。
至於唔想受掣肘，只係儲飛行里數，大概以現金回贈最啱用啦。但各家信用咭出手有高有低
，容許筆者日後在本欄「點評」。有固定消費模式嘅人，大概荷包中都會有張商戶聯營咭喺身，
就如車主們都總有張油站聯營咭。雖然上述嘅信用咭消費「目標」明確，但針永遠無兩頭利，呢
類咭埋單都未必一定著數。
本欄下一篇將教大家秘技，如何將日常消費盡用信用咭畀錢，如何極速儲積分、賺回贈。請
密切留意。請請！
撰文：任我行
【你點睇】本港水費近30年不變，水務署表示有需要調整，以改善經營狀況，你認為加水費可否接受？► 立即投票
