RSS訂閱 喺啱啱過去嘅十月頭國慶黃金周長假期，缸友如果提早部署定啲馬交佬或者神州食品股，應該都有啲斬獲。而黃金周過後，下一個炒作嘅節日就係冬季啦。就嚟入冬，燃氣嘅需求會增加，呢個時候部署定啲燃氣股就啱曬啦。
野村早前發表報告指，睇好今年神州東北省份對燃氣需求仍大，繼續出現供應短缺嘅情況。而且神州自２０１７年起推動「煤改氣」嘅政策，鼓動使用清潔能源，今年冬季燃氣股仍然有炒作。
今日博客就推薦一隻走勢比較落後嘅燃氣股，北京控股（００３９２）。相比起佢旗下近排跑出嘅神州燃氣（００３８４），佢升幅明顯跟唔上。睇埋佢嘅基本面，公司上半年收入達到３４２億銀，按年持平，而盈利就較上年同期增加一成一，主要受旗下中石油北京管道公司嘅天然氣輸氣業務同中國燃氣業務帶動，業績可謂穩步增長。
燃氣股作為公用事業，息率都係其中一個考慮嘅因素。而相對起其他比較大隻嘅燃氣股，北控股息算係相對高，目前有３﹒０８厘，而神州燃氣、新奧能源（０２６８８）同潤燃（０１１９３）都係分別得１﹒３厘至１﹒８厘。從呢個角度睇，買入北控可以博追落後。
睇埋個公仔圖，近排股價大約喺３５﹒３銀水平築左個圓底兼形成咗雙底，近日連開三支陽燭，呈回升跡象。今日隨整體燃氣板塊都有裂口高開，升破２０天線（３６﹒５１銀），而且１４天ＲＳＩ已經回升至５０嘅水平，短期回升空間仍大。博客建議現價買入，初步阻力位可以睇番七月中嘅橫行區大約３８﹒５銀水平，支持位睇住１０天線（３５﹒９銀）。
《編者按》本欄搜羅即市傳聞，惟消息未經證實，《經濟通》亦不保證內容之準確性。
樂本健【秋日開倉26 - 27/9】保健品低至$20！► 火速行動
