RSS訂閱 依家離網易（０９９９９）入飛截止仲有一日，相信唔少缸友都好似博客咁心大心細諗緊抽唔抽，話晒噚日（３日）隻股隔晚美國ＡＤＲ收報４１４﹒５８銀美金，以每１份ａｄｒ代表２５股普通股計，即每股１２８﹒５２銀，以香江公開發售定價上限１２６銀計折讓收窄到２％，但都驚上市首日炒唔上呀！所以到依家，據報，只係超購８０倍左右。
不過，博客就話以價位嚟講，佢嘅增長潛力雖然不及騰訊（００７００），但相信佢上市之後，會係一隻波動性較騰訊低，業務有穩定增長嘅股份，而且入場費低騰訊七成，幾合適一啲資本較少嘅缸友玩。
睇返招股書，據Ａｐｐ Ａｎｎｉｅ數據，按上年ｉＯＳ同Ｇｏｏｇｌｅ Ｐｌａｙ綜合用戶支出計算，網易係全球第二大移動遊戲公司，集團最大收入來源係在綫遊戲（包括自研同代理遊戲）今年首季嘅收入佔整體逾７９巴仙。集團收入穩步增長，喺今年新型肺炎疫情高峰嘅首季，淨收入按年增長１８﹒３巴仙。睇全年業績，淨收入喺２０１８同２０１９分別按年增加１５﹒２巴仙同１５﹒７５巴仙。
仲有佢今次集資唔係用嚟還債，假設超額配股權全部被行使，總額會有２４４﹒８７億，入面九成會用嚟豐富海外市場的在綫遊戲內容，投資於國際遊戲開發商、ＩＰ及內容所有者以及與其合作、提升研發技術同用戶體驗，仲有一成會用喺企業用途或者潛在的戰略投資及收購，反映集團對企業擴張有一定野心。
不過，網易欠缺具規模嘅自家發行渠道，好倚賴一啲的應用程式商店、安卓系統嚟發行遊戲，所以就算遊戲大賣，呢啲渠道亦要分杯羹，可能會令純利受壓呢點就係長線投資者要考慮嘅地方，或者要睇管理層有無心去解決問題啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
