RSS訂閱 今日魚缸喺兩萬六水平拉鋸，唔少近排爆炒嘅熱門魚毛都要降一降溫，但前景好又有國策支持嘅魚毛都不妨留意下，趁調整吸納！其中一隻短期升逾倍嘅就係炒海島概念嘅美蘭空港（００３５７）。
喺神州六月公布海南自貿港概念之前，美蘭空港都無咩人留意，間唔中仲被海航啲負面消息影響。但隨住圍繞呢個國策嘅措施逐步出台段，佢再度落鑊炒起。事關今個月起每名旅客每年免稅購物額度從３萬人仔提升至１０萬人仔，加上離島免稅政策落地後，神州媒體都瘋傳海南嘅「唉瘋」好抵買，同版本平過神州官網成千幾人仔，都咪話唔吸引。
再加上目前神州疫情受控，但海外仲有增無減，人哋幾時開關都未知，想短線去旅遊，海南島都係一個唔錯嘅選擇！近月當地政府已積極部署導遊培訓活動，並加強網絡旅遊宣介，博客相信，海南島旅遊業喺第三季可望近來強勁復甦！咁經營海口美蘭國際機場免稅店業務同酒店服務嘅美蘭空港理所當然大大受惠啦。
呢隻魚毛嘅潛力近排都獲大行大摩留意到，佢最新發表報告，首予美蘭空港「增持」評級，他屐仲睇到３７銀，距離現價約３２﹒５銀仲有一成四潛在升幅，唱好嘅理由除左有神州旅客轉攻國內遊之外，仲因為美蘭空港有機會打造成國際主要機場，而同其他機場佬相比，美蘭嘅估值相對低。
見住呢排美蘭空港嘅股價係咁升，相信唔少缸友已經心郁郁想入市，今日雖然回落少少，但博客認為仍然未夠吸引，建議待回落至２５至２６銀再吸納，中線他屐睇４０銀！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
