我諗好多人都夾過公仔扭過蛋,無他,十零廿蚊就有交易,咪撞下手神囉。夾公仔,享受嘅係過程,由你左度右度,揸住碌棍左搖右搖,瞄準之後㩒掣,然後睇住隻機械手慢慢向下、抓落去,高潮就係呢一刻喇!夾唔到固然慘叫一聲:「唉呀!」夾到都唔好開心得太早,因為隨時喺運送過程墜機!扭蛋就無咁刺激,但一定有獎!
至於買食物送公仔呢招,其實算係CrossOver嘅始祖,老麥都玩咗好多年啦,其他服裝或日常用品都利用呢招,吸引埋另一品牌嘅粉絲去產生協同效應,增加營收。
內地肯德基為咗慶祝開店35周年,今個月初同盲盒玩具公司泡泡瑪特(9992)聯合推出「DIMOO聯名款盲盒套餐」,共有6個正常版同一個隱藏版「王牌炸雞」公仔,全國限量發售26.388萬個。消費者只要喺肯德基門店買99元人仔嘅盲盒套餐,就可以得到DIMOO盲盒一個。要集齊一套起碼要買6份啦,而抽中隱藏版公仔啦嘅機率唔夠1.4%(其實都算高)!
所謂物以罕為貴,為咗抽到個隱藏版,即時掀起搶購潮,有人更洗成萬蚊去買一百份套餐,咁梗係請槍,搵人幫口食啦!目的只係要抽中個隱藏版,呢隻原價只係69蚊人仔嘅公仔,喺二手市場炒到800蚊添。但我都係唔明條數點計,睇怕都係有啲人冇我有嘅心態作祟。
舊年內地先提倡唔好浪費食物,依家咁搞法,自然惹嚟中國消費者協會發文批評,話肯德基利用盲盒誘導消費者非理性過度消費,應該抵制,肯德基就一於少理,話暫無計劃停止活動。計我話,肯德基可以改為盒照拆、雞留低,並將部分收入捐出,咁就一雞三味啦!《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
全新節目《說說心理話》青少年不可以戀愛!?真實個案講述驚心動魄經歷► 即睇