RSS訂閱 《笑傲缸湖》近年歐美通脹升到嘭嘭聲，打工仔女為咗應付不斷上升嘅物價都苦不堪言，如
果要供樓可能仲慘。美國有對退休無耐嘅夫婦就發現，住喺郵輪嘅開支竟然仲平過住陸地，近期
就寄居郵輪上周遊列國，仲話如果第時有辦法，可能仲會餘生以郵輪為家添！
住郵輪平過陸地呢個ｐｏｉｎｔ係由５３歲嘅退休會計師Ａｎｇｅｌｙｎ發現嘅。佢話佢哋
兩公婆如果住喺陸地，唔計伙食、交通同娛樂等日常開銷，淨係按揭、上網、用電等費用加埋稅
同保險等，一個月就要使３５００蚊美金（約２萬７千幾蚊港紙）。但如果係坐郵輪，包括房租
、飲食同免費娛樂，每日都只不過係使１００蚊美金（約７８５蚊港紙）左右，好抵喎！
Ａｎｇｅｌｙｎ嘅５１歲退休電腦程式員老公Ｒｉｃｈａｒｄ聽到咁講，再諗埋物價係咁升
，兩公婆又咁鍾意去旅行，於是決定將佢哋喺西雅圖間屋畀咗佢哋２１歲至２８歲嘅其中３個仔
女住，並由佢哋３個年輕人負責按揭同埋其他開支，自己就坐郵輪無限期享受二人世界喇。
Ｒｉｃｈａｒｄ兩公婆由舊年開始就去咗１０次郵輪旅行，期間去過佛羅里達州同加州，仲
有巴哈馬、墨西哥、巴拿馬同埋加拿大等，一次旅程結束就會喺陸地度短暫停留再啟程，預計之
後仲會去埋歐洲同澳洲。佢哋仲發現行程中除咗可以享受華麗嘅船艙同飲食之外，仲唔使自己清
潔周邊環境，同埋無街坊鄰里吵鬧，好正咁話。
香港人有無諗以郵輪為家？盈盈唔知道，只知道喺香港都有啲有錢人以遊艇為家，而且似乎
以外國人為主。如果艇主本身有牌識駕駛遊艇，想去邊落腳就去邊，聽落都幾浪漫，不過都要考
慮吓自己係咪健康，仲有面對不似預期嘅天氣又要點應對，對漂浮嘅生活又習慣嗎？開支又會唔
會高過住喺陸地呢？始終居住唔同去旅行喎，要兼顧嘅嘢都唔同，唔知有幾多香港人會有咁嘅想
法，無論係住遊艇定郵輪，銀兩同埋學識唔少得，要做多啲功課先至得！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
