《小傳日記》毛戈平招股進入倒數，IPO履敗原因多，認購要斟酌

　　聽日（５日）就係毛戈平化妝品招股嘅最尾一日啦，網上好多人都喺度討論緊應唔應該抽，而家已經有好多「專家」發表咗關於毛戈平應唔應該抽嘅建議，筆者就唔喺度班門弄斧發表意見啦。不過可以一齊回顧下毛戈平之前八年衝擊Ａ股ＩＰＯ失敗嘅原因，再嚟考慮有冇抽嘅必要。

　　簡單講講毛戈平坎坷嘅上市之路。早喺２０１６年，毛戈平就首次遞交咗Ａ股ＩＰＯ，想喺上交所主板上市。但唔知點解，之後申請進程就陷入停滯，到咗２０２１年，毛戈平終於通過中證監嘅發審委會議，但之後始終冇收到中國證監會嘅正式批准。

　　２０２３年３月，內地實行註冊制上市制，毛戈平再次遞交ＩＰＯ申請，同年９月因財務資料過期，申請被上交所中止審核，最終喺２０２４年正式撤回Ａ股申請。經過幾次Ａ股上市失敗，最後毛戈平決定轉去港交所，喺２０２４年４月首次遞表，後來招股書６個月失效，１０月９日又再次遞交ＩＰＯ申請表，終於行到今日招股呢步。

　　佢衝擊Ａ股失敗嘅原因，大家講法不一，比較可信同有說服力嘅，主要覺得喺個人ＩＰ太重、營收較為單一、同研發能力不足呢幾方面。

　　先講個人ＩＰ太重啦，毛戈平作為國內超級出名嘅頂級化妝師，擁有多個金光閃閃嘅頭銜，例如「文化部一級形象設計師」、「２００８　年北京奧運會開幕式造型設計師」等，連旗艦品牌「ＭＡＯＧＥＰＩＮＧ」都用佢嘅羅馬拼音命名。公司業務經營同增長前景一直靠毛戈平個人ＩＰ驅動，佢個人魅力同口碑對品牌發展影響好大。好多消費者都因為佢超高嘅化妝技巧而買佢品牌嘅單，但咁就導致品牌同佢個人深度捆綁。萬一毛戈平ＩＰ嘅熱度下降或者出現負面報道，對品牌嘅影響好明顯，銷售同財務狀況都會跟住受影響。

　　再講營收較為單一，毛戈平旗下雖然有「ＭＡＯＧＥＰＩＮＧ」同「至愛終生」兩個美妝品牌，但２０２１年至２０２４上半年，ＭＡＯＧＥＰＩＮＧ品牌產品銷售收入佔公司產品銷售總收入嘅比例一直維持喺９５％，甚至今年上半年高達９９﹒３％。公司太過依賴單一品牌，萬一主品牌市場表現唔好，公司業績就會受到好大影響。毛戈平獨有嘅化粧培訓及相關嘅銷售佔比只有４％左右。

　　最後講研發投入不足，２０２１年至２０２３年，毛戈平嘅研發投入一直在０﹒８％－０﹒９％之間徘徊，比起化妝品行業好多２％及３％佔比嘅研發投入，佢真係少好多。研發投入不足可能會影響公司未來嘅產品創新同競爭力。在開拓新市場或者進入新嘅細分領域時候，需要強大嘅研發能力作為創新，以符合市場嘅不同定位。

　　因此，毛戈平之前衝擊Ａ股失敗嘅原因有好多，大家想抽嘅話，不妨再三考慮上述因素。請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。