《小傳日記》花旗國「揸ＦＩＴ人」侵侵真係「鑊鑊新鮮」，內閣人事問題不斷，最新有首
席智囊班農「被逼離職」。在侵侵「風險」下，當地魚缸想安穩都難，道指周五晚就跌咗７６點
收２１６７４點。
雖然外圍不穩，但係香江呢邊，今朝就高開５３點慶祝「聯通混改」獲批嘅好消息，之後油
佬同恆大（０３３３３）、融創（０１９１８）兩位內房孖寶落鑊，都為魚缸沖一沖喜。恆指收
市都袋咗１０７點報２７１５４；國指就踢起５７點報１０７５１。
不過，恆指仍然收低廿天線（約２７３２４點），缸友信心都唔係好大，全日成交約有
８１９億銀。
＊聯通急抽上高追易受傷，潤燃灰到爆聯想無遐想＊
聯通（００７６２）媽咪混改方案終於獲得阿爺特批「開綠燈」！聯通Ａ股
（滬：６００５０）作為今次混改平台，引入股王ＱＱ（００７００）旗下騰訊信達、國壽
（０２６２８）（滬：６０１６２８）、阿里旗下阿里創投等粒粒巨星，多間券商都出力唱好；
聯通Ａ股復賽就即漲停，香江呢邊都當然唔執輸，獲野村維持目標１５銀，刺激股價爆升近１１
巴仙至１３﹒２４銀，創逾兩年高位！不過升得咁急，唔少缸友都決定獲行離場，聯通埋單升幅
得番近４巴仙收報１２﹒３６銀。哎喲！高追嘅都咪話唔傷。
潤燃（０１１９３）中期只係多賺８巴仙至逾２１億銀，券商就唔太滿意，仲叫缸友換馬去
同業好過，搞到潤燃心灰急插近８巴仙收２７銀，慘！
藍戰聯想（００９９２）上星期五（１８日）放榜，首季意外見紅後，多間投行都今日都咬
住唔放，又削目標價，又叫沽貨，結果聯想藍戰中包尾，跣低近３巴仙收４﹒４４銀。
＊融創發盈喜恆大更歡喜，中海外績優個價立即起＊
雖然最近神州樓價漸漸無之前升得咁勁，但唔少磚頭佬嘅上半年成績表相當靚仔，攞開頭彩
嘅融創發盈喜，話上半年大嗱嗱賺多咗１５倍以上，缸友聞訊即蜂擁而上，全日成交超過９億銀
，股價全日升咗近７巴仙，報１９﹒１８銀。四條三恆大下個禮拜一先放榜，但今日最威水就係
佢，今日偷步炒高近１８巴仙，報２２蚊。
中海外（００６８８）中午派成績表，上半年賺多咗兩成半，股價一度升超過半成，但埋單
只有近３巴仙落袋，報２５﹒５銀。「給你一個五星級的家」嘅碧桂園（０２００７）雖然聽日
先放榜，但今日都冇走雞，全日埋單計升咗超過４巴仙，報９﹒５６銀。
＊油價大彈跳三桶油即笑，建滔系放榜你俏我更俏＊
花旗國鑽油台數目減少；中東嗰邊，利比亞最大油田又話因為被武裝團體佔領咗而暫時停產
，加上外媒收到風話石油大佬埃克森美孚關閉咗一個煉油廠，油價喺上個周五爆升超過３巴仙，
將會喺今個星期排隊放榜嘅「三桶油」頹咗一排之後，今日終於發威，中石油（００８５７）四
連陰後升咗超過一巴仙，報４﹒８６銀，但依然升唔破十天五十天線；中海油（００８８３）就
最省鏡，彈高咗近４巴仙，報９蚊，升破晒十天、廿天同百天線；中石化（００３８６）喺五個
月低位５﹒５９銀跳彈床，升咗近兩巴仙，報５﹒６９銀。
本地薑建滔化工（００１４８）上半年賺多咗近４５巴仙，派息更加好豪氣，比舊年同期多
咗一倍，之後細摩同花旗仲要出嚟唱好。咁多好消息刺激下，隻股今日成功喺３９﹒８銀歷史高
位插旗，全日爆升咗超過一成，報３９﹒６５銀；囝囝建滔積層板（０１８８８）一樣巴閉，上
半年賺多超過一倍，今日就升咗近７巴仙，報１２﹒４８銀。
＊毛利率受壓師傅也曳曳，申州與瑞聲尾段有點翳＊
嚟自寶島嘅食品佬康師傅（００３２２）終於都一洗頹風，上半年賺多咗五成半，但毛利率
大嗱嗱跌咗２﹒５３個百分點至２９﹒１巴仙。師傅仲話，原材料成本無上升壓力，毛利喺短期
間仍然會有下跌壓力，缸友聞訊即掟貨走人，全日跣低超過半成，報１０﹒５２銀，失守埋條十
天線（１０﹒７６６銀）。
本地薑紡織佬申州國際（０２３１３）呢期相當巴閉，雖然噚日先放榜，但缸友已經估到佢
嘅成績表會相當靚仔，上個禮拜已經炒高咗超過９巴仙，一向唔派中期息嘅佢竟然闊佬咁話每股
派七毫子，而中期就多賺２４巴仙。隻股朝早一度彈高最多一成，喺山頂位６２﹒９銀插旗，但
埋單只係升咗近３巴仙，報５８﹒８５銀。
瑞聲（０２０１８）禮拜五先放榜，但瑞信今日出嚟唱好佢，「他屐」升到去１３６銀，朝
早一度升咗８巴仙，埋單得超過４巴仙升幅落袋，報１１７﹒２銀。街坊鴻騰（０６０８８）朝
早喺山頂位５﹒２６銀插旗，但之後有唔少缸友喺高位散水，埋單倒跌超過３巴仙，報４﹒９５
銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
