《小傳日記》香江魚缸踏入1月之後似乎有好兆頭出現,連升三個禮拜加埋進帳咗1586
點。然而,正當缸友對後市仲有信心之際,花旗國終於按耐不住向楓葉國提出要引渡華為太子女
孟晚舟,加上有傳花旗國話因為雙方喺知識產權方面仍然有巨大分歧,貿易談判消息此起彼落,
今個月尾嘅談判一時消息話有阻阻滯,一時又話無風無浪,搞到好友淡友陀陀擰!
中美關係時好時壞,好友淡友都未敢大舉揮軍,魚缸今日大部分時間都唔上唔落,今朝就已
全日最低位開市,報26879點,跌咗125點。冇幾耐一度最多反彈125點,全日高見
27131點,但升勢只係曇花一現,之後又最多倒跌125點,全日低見26879點。雖然
之後跌幅已經大幅收窄,但就一直喺二萬七關附近爭持,最後埋單係咁依升咗2點,報
27008點,再一次險守二萬七。主板成交778億銀,較噚日少咗近8巴仙。
國貨佬指數報10631,升17點。滬指今日都係唔上唔落,微微彈起1點,報2581
點。
*中資電訊商今日好吃香,5G股熱炒缸友賺到飽*
魚缸悶市,不過全城熱炒5G概念,幾隻相關概念嘅魚毛就繼續表現強勢,好似三大中資電
訊商入邊,就以中電信(00728)表現最好,今日一支陽燭上,最高見4﹒37銀,創近三
年半新高,全日升逾5巴仙,報4﹒36銀,係表現最佳國貨佬!中聯通(00762)就跟升
逾4巴仙,報9﹒04銀,收復百天線(約8﹒8銀),係升勢最勁嘅藍戰士!藍燈籠中移動
(00941)噚日就畀花旗唱好,話佢喺4G「孖屐」面對嘅市佔率壓力減少,今年嘅價格競
爭會比上年紓緩,所以畀佢92蚊「他屐」同「買貨」評級,全日都升逾1巴仙,報81﹒3銀
。
除咗電訊商,喺5G入邊最先受惠嘅設備佬當然都盡顯升勢啦,好似鐵塔(00788)今
日又破頂喇!最高見1﹒72銀,全日飆半成,報1﹒68銀。京信通信(02342)亦升近
9巴仙,報1﹒77銀,今個月以嚟已經勁彈超過三成七!中通服(00552)跟升8巴仙,
報7﹒46銀。不過,做光纖嘅長飛光纖(06869)唔得「孖屐」鍾意,股價近排都係呆呆
滯滯,今日仲要唔見咗一格,報21﹒75銀。
*野村急削價舜宇又向下,唱好未見效QQ向下拗*
兩隻手機孖寶再畀野村削價,野村話跟蘋果搵食嘅瑞聲(02018),因為蘋果過去兩個
月減「唉瘋」訂單,而下調佢今年同上年嘅盈利預測,所以下調瑞聲「他屐」由63﹒40銀到
53元,維持「中性」投資評級,令瑞聲今日都要走低1巴仙,報45﹒1銀。而舜宇
(02382)就更傷,除咗畀野村削價,由90銀到83銀,投資評級亦由「買貨」下調到「
中性」,今日唔見多過3巴仙,報70﹒8銀,係表現最差藍戰士,兩日加埋唔見咗超過6巴仙
!其他手機設備佬都跌,信利(00732)就跌2巴仙,報0﹒91銀;高偉電子
(01415)唔見2巴仙,報0﹒9銀。
新經濟佬兩邊走,美圖(01357)唔見2巴仙,報2﹒34銀,已經連跌四日蒸發咗超
過一成四!閱文(00772)就勁升近半成,報39﹒15銀。神州噚日公布第三批遊戲版號
名單,但QQ(00700)未上榜。雖然大行之後出力唱好,好似野村就叫大家再等等,長遠
嚟睇,QQ仲係投資首選;巴克萊仲升佢「他屐」到392蚊,維持「Hold貨」評級,但可
惜缸友無理繼續掟貨,今日QQ都要跪低近1巴仙,報333﹒2銀。
*產量恐急升油股好驚青,花旗升目標華晨起勢飆*
早一排中東佬又話減產,呢個時候「孖屐」又怕花旗國頁岩油產量激增。另外,國際貨幣基
金組織(IMF)又調低全球經濟預測,話今年經濟增長會放緩咁話。隔晚布油同紐油都跌逾
1巴仙及近2巴仙,「三桶油」都急急腳跪低,中海油(00883)跣低逾2巴仙,報
12﹒62銀;中石油(00857)唔見逾1巴仙,報4﹒9銀;中石化(00386)跌近
1巴仙,報6﹒12銀。
大行花旗唱好四個轆,話華晨(01114)雖然出售25巴仙寶馬股權,但預料可能將呢
筆收入豪爽派畀股東,當作2022年嘅特別息,而且又預測神州一二線城市四個轆銷售會有起
色,所以維持華晨「掃貨」評級,「他屐」由7﹒2銀升到去8﹒8銀,華晨衝前逾半成,報
6﹒88銀。其他街坊都踩油跟上,長汽(02333)漲近4巴仙,報5﹒32銀;比亞迪
(01211)抽高近2巴仙,報45﹒3銀。吉利(00175)就溜後跌逾1巴仙,報
12﹒24銀。
*潤電組新企股價係咁起,國家隊救亡興業卻徬徨*
早幾日潤電(00836)同新濠(00200)主席何公子組成「華潤黑桃新能源公司」
,話要發展新能源。唔知係唔係缸友睇好佢地發展,潤電呢幾日成功突破10天同20天平均線
,而且見三連陽,今日飛起近3巴仙,報15﹒84銀。其他電力街坊都有資金追捧,神州電力
(02380)一樣炒高近3巴仙,報1﹒96銀。華能國電(00902)跳起逾1巴仙,報
5﹒06銀。大唐發電(00991)升逾2巴仙,報2﹒01銀。
興業太陽能(00750)停牌多月,主要因為去年10月票據到期後無錢還,之後就搵咗
國家隊執手尾,仲入股成為大股東,但都無用啦,缸友照睇淡佢嘅發展,今日復賽即大瀉近五成
,報1﹒11銀,係全日跌幅最大嘅個股!其他光伏股一樣冇運行,一哥保利協鑫
(03800)跌近2巴仙,報0﹒5銀。協鑫新能源(00451)唔見咗超過3巴仙,報
0﹒28銀。福萊特玻璃(06865)就插近3巴仙,報2﹒38銀。請請!
《編者按》本欄搜羅即日熱門傳聞,惟消息未經證實,《經濟通》亦不保證內容之準確性
本文只供參考之用,並不構成要約、招攬或邀請、誘使、任何不論種類或形式
之申述或訂立任何建議及推薦,讀者務請運用個人獨立思考能力自行作出投資
決定,如因相關建議招致損失,概與《經濟通》、編者及作者無涉。
樂本健【秋日開倉26 - 27/9】保健品低至$20!► 火速行動