RSS訂閱 香江魚缸經過噚日（６日）嘅「小股災」洗禮之後，股王ＱＱ（００７００）、藍戰「新貴」舜宇（０２３８２）今日一度發力想收回失地，正當缸友以為逐漸回暖之際，魚缸竟然由彈起最多２５３點，轉為倒跌８９點報２８１３４暫半日低位。缸友若只憑見噚日大市成交額高達約１６２７億銀，便以為有神州有大戶「泵錢」落來，博客只可以說：「缸友，你太年輕了」！查實，係北水規模持續降低，ＱＱ（００７００）畀人掟貨就真。
喺呢個時勢，除咗博客喺噚日同大家講嘅「公用三寶」作避險之選之外，查實仲有Ｄ股仔係可以「進可攻，退可守」嘅，呢隻就係長實集團（０１１１３）喇！
點解？回顧其走勢，佢自８月初始升，半年績佳賺咗６７個巴仙，幾日後仲爆升至７０﹒０８銀嘅新高添，雖然其股價喺９月尾回落至初，但踏入１０月後，孖屐便傳出佢以４０２億銀嘅天價放咗中環中心呢個甲級寫字樓，勁！其後股價也便應聲彈高至６８﹒５５銀嘅月內高位。
更重要嘅係，博客篤過計數機，當大市由１１月中嘅３０１９９高位，直插至噚日
２８２０４嘅低位，一共蒸發咗１９９５點，但長實喺同一個Ｐｅｒｉｏｄ就只不過係冇咗
１﹒２銀而已，真係要畀番Ｄ掌聲佢呀！
近日港銀１個月拆息仍然係１厘樓上，美電仍高企於７﹒８１銀，呢隻本地磚頭佬依然企穩，叻！長實集團依家幾條平均線集合一齊，似是準備突圍，睇好嘅缸友可在現水平吸納，上望
６８銀喇！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
