RSS訂閱 依家香江魚缸整體都唔多掂，反而同神州有關嘅魚毛仲有「餐士」反彈。凡事都要睇阿爺頭，見阿爺近排好關注國民健康，早前除咗出國策力捧體品股之外，仲有力捧醫藥股，所以博客今次就嚟講吓中生製藥（０１１７７）！
早前神州公布藥品「４＋７」帶量採購擴至全國開標計劃中標結果裡面，中生製藥有５種藥品中標，同時亦有２種藥品落選。雖然中標藥品會因而被降價，但日後或會有更多公營醫院去選用佢嘅藥品，令中生製藥收入保持穩定。而且細摩亦對中生製藥是次中標結果嘅總體影響持中性態度，因為該行相信神州嘅仿製藥行業日後會加速整固，行業領先藥企更會轉型至創新藥物研發上。另外，經過呢一輪帶量採購政策之後，研發能力比較差嘅藥企無中標，之後亦會被淘汰，此舉幫咗中生製藥淘汰唔少對手，成為最終受益者添！
喺業務方面，中生製藥喺上半年嘅研發投入就有１６﹒２６億銀（人仔．下同），研發費用率達１３巴仙，預計喺未來５年仲有１５至２０個新產品上市，或對業績增長提供助力。上半年嘅純利就升近６巴仙約１４﹒４４億銀；收入近１２５億銀，較去年同期增長近２９巴仙，新產品銷售佔總收入近１９巴仙！咁睇新產品嘅爆發力都不容睇小！細摩亦認為公司基本面仍穩固，而且有強勁嘅研發投入，所以重申對其「增持」投資評級同「他屐」１４﹒５銀。
睇返公仔圖，中生製藥嘅ＭＡＣＤ熊差距開始收窄，而且ＳＴＣ嘅Ｋ線同Ｄ線有向上趨勢，睇嚟短線仍然可以繼續睇好，可以等佢再回落至十天線（約１０﹒２銀）分段買入，短期「他屐」為上個月高位１２﹒２２銀！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
