RSS訂閱 《笑傲缸湖》亨氏（Ｈｅｉｎｚ）嘅產品可以話係一直陪伴盈盈成長，由細細個屋企成日食
嘅茄汁焗豆，到喺Ｍ記成日食到嘅茄汁。不過，講到茄汁，呢樣嘢簡直係花旗國人嘅摯愛，幾乎
食乜都鐘意落茄汁，無論係食熱狗定係去「鋸扒」都好，總會有一支茄汁。花旗國喺舊年嘅獨立
日，當地人呢一日就用咗３７００萬美金去買茄汁慶祝。
茄汁喺花旗國人民嘅心目中擁有如此崇高地位，但亨氏呢家全球加工龍頭近排就有新搞作去
挑戰大眾嘅口味，話計劃推出一種由沙津醬跟茄汁混合而成嘅「沙津番茄醬」
（Ｍａｙｏｃｈｕｐ），而亨氏就用一個相當民主嘅方式去決定要唔要推出呢一隻咁重口味嘅新
醬，只要喺今個月１５號之前，喺推特（Ｔｗｉｔｔｅｒ）上面有超過５０萬個網民投票贊成推
出呢隻醬，咁亨氏就會推出。
不過，花旗國人對呢一種咁奇特嘅醬唔多睇好，唔少留言中都夾雜咗一種厭惡嘅味道，有位
網友都好精警咁話，呢一種醬就好似啱啱食完一隻好難食嘅沙津醬，然後嘔返出嚟嘅嘢。雖然「
沙津番茄醬」仲未推出市面，但從圖片可以睇到，瓶身上面已經印有「Ｄｅｌｉｃｉｏｕｓ」（
美味）呢個字，睇嚟亨氏都好似相當有自信，花旗國缸友會好受落。
其實，大家可以先喺屋企將呢兩隻醬溝埋一齊試下，但盈盈諗緊呢兩隻味相當唔ｍａｔｃｈ
下，溝咗嚟味道真係難以形容。不過，呢支醬他日面世，盈盈都會拎嚟煮嘢食，應該可以獲「地
獄廚神」嘅稱號。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
