RSS訂閱 《笑傲缸湖》噚晚（１６日）被稱為「指數基金之父」嘅博格爾（Ｊａｃｋ Ｂｏｇｌｅ）
逝世，終年８９歲。金融界各路名人都對博格爾逝世覺得遺憾，其實博格爾喺近九十年嘅人生都
對整個金融界做過唔少嘢，就連「股神」巴菲特同大鱷索羅斯都對佢十分尊敬，不如等盈盈講吓
佢嘅生平先。
博格爾喺現時全球第二大資產管理公司領航（Ｖａｎｇｕａｒｄ）嘅創辦人，亦係喺
１９７５年第一個創立同指數掛勾基金嘅著名投資者，之後被世人紛紛仿傚，缸友們認識嘅盈富
基金（０２８００）到南方Ａ５０（０２８２２）呢類ＥＴＦ都係仿傚自博格爾當初嘅概念，不
過其實呢個構思剛剛面世嘅時候，大家都唔係太睇好，主要原因係因為當時呢類指數基金，以較
低嘅門檻去吸引散戶入場，同當時投資風氣好唔同。不過成功就係要堅持，領航基金愈做愈大，
當初唔睇好嘅同業都紛紛跟隨開設，到依加花旗國魚缸更加有超過３０巴仙嘅成交喺指數
ＥＴＦ，你話影響幾大呢！
正因為博格爾喺金融地位舉足輕重，「股神」巴菲特都喺上年年刊嗰陣寫到，佢話：「如果
要為一位對花旗國投資者作出重大貢獻嘅人豎立雕像，向佢致敬，咁嗰嗰人一定係博格爾。」到
噚晚巴菲特接受外媒訪問嗰陣，佢仲話：「博格爾係咁多個我認識嘅投資者入邊，貢獻最多嘅一
位。」
其實，博格爾投資都有佢自己嘅一套，佢將市場收益分成兩個來源，一部分係投資收益，一
部份係投機收益。投資收益係股息率加上未來嘅收益增長率，平均嚟講係５巴仙，但唔會高於７
巴仙；投機收益就同市場估值有關，通常佢會持貨１０年，如果當中嘅魚毛市盈率由１０倍升到
２０倍，咁１０年內就可以增長７巴仙。
另外，缸友可能更加關心現時金融市場嘅走勢，其實博格爾喺佢離世之前，就已經對投資者
講現時全球主權同企業債務巨大、加上貿易衝突變得明顯，喺不明朗因素之下，加上投資者選擇
投資指數基金，令主動型基金嘅投資者減少，長遠嚟睇可能為金融市場埋下爆煲伏筆，所以缸友
們買貨嘅時候，都要留意留意啊！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
