RSS訂閱 《笑傲缸湖》為咗遏止新型冠狀病毒蔓延，全球各地都實施嚴格嘅封關措施。但由於封關措
施都係個緊急嘅決定，唔係個個人都有心理準備，所以一啲分隔異地嘅情侶都因此要忍受短暫嘅
分別。而喺北歐國家丹麥，自從當地喺３月１４日封關，禁止非本國居民入境以來，部分情侶只
能各自喺丹麥同德國接壤嘅邊境，遙望愛人。
眼見當地確診人數開始回落，疫情漸趨穩定，政府就決定逐步放寬同周邊國家嘅封關措施，
包括允許由於疫情關係分隔異地嘅情侶，可以入境同喺丹麥嘅愛人相見，但前提係要證明兩人嘅
關係至少維持咗半年。
咁點樣先可以證明係拍緊拖嘅情侶關係啊？原來最初當局要求申請人提供同男朋友或者女朋
友之間嘅合照、文字對話記錄或者對方嘅個人資訊，結果就被法律界人士質疑咁樣做係侵犯私隱
。最終，當局就決定放寬證明嘅門檻，話只需要提交書面聲明，承諾雙方都係發展中嘅關係就可
以獲批入境，具體嘅詳情會喺未來幾日之內公布。
不過淨係得份證明感覺上都幾兒戲，當局就建議申請人可以同時遞交埋相片或者情信，因為
對話同相片呢類私人嘅物品係可以增加可信性，始終最終決定權仍然喺官員嘅手中嘛。
雖然當局係執行放寬伴侶入境嘅安排上有爭議，但對於分隔兩地、飽受思念之苦嘅情侶嚟講
，點都係一件喜訊嚟嘅。盈盈都希望措施可以盡快落實，當然最重要都係疫情快啲過去，咁大家
都可以更加方便直接見到自己想見嘅人啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
