上星期單減免股息紅利時所需繳納的20%所得稅，似乎仲炒緊，不過呢單嘢並唔係恒指轉升嘅主因，皆因恒指早喺今年1月22日低見14794點後就開始轉升，就算係最近個升浪，都係4月19日跌到16044點後開始，所以極其量，減免脫息紅利所得稅只可以話為升市錦上添花！不過，實際作用有幾大就唔知喇，畢竟買股票唔係睇呢啲雞毛蒜皮嘅支持，而係投資於上市公司嘅盈利前景同股價嘅潛在上升空間！
恒指今朝低開後橫行，之後逐步上升，仲突破埋萬九點，高見19097。但要留意，恒指已經進入以100點為區間嘅熊證重貨區19000至19099，換言之，通常情況下，重貨區淪陷之後，恒指都會行返轉頭，適逢周三(15日)佛誕假期又係月中，以4月下旬以嚟累積咗3053點升幅，下半月進入調整浪機會好大，技術上，250天線就係重要嘅回調支持，到時再部署恒指好倉啦！
個股方面，小米(01810)喺佢個微博發放嘅消息指，近日，小米同京東(09618)達成全新戰略合作，未來三年，雙方明確咗小米喺京東全通路銷售額2000億的目標，同時將會共同推動多種類小米智能硬體產品大眾化普及，令更多用戶享受到小米全場景智能化體驗，加速「人車全生態」策略全面展開。
今朝小米最高見過19.62銀，較上日升1.1%；京東最多就升1.3%，高見128.2銀，叫做跟升，表現唔算標青。大企業合作以達至協同效應係生意之道，小米造車，搵人幫手宣傳賣車好正常，但點解唔係搵汽車代理，而係搵京東呢個電商平台去做？會唔會係因為貪註冊人數多好銷售，加上可以做埋物流，由落單到出貨做到一條龍服務？就算係咁都冇咩特別啫。
兩隻你俾我揀，我會揀京東，走勢上，小米已經升咗一大段，京東就好似剛起步，短線以120銀為強力支持，突破並企穩150銀，下一目標就係250銀，現價127銀水平分兩段買入，跌穿100銀收市止蝕一半，另一半跌穿78銀收市先止蝕，重新部署。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】政府宣布10項短期控煙措施，你是否支持？「火車頭」問題未有規管，你接唔接受？► 立即投票
38,924.46
17,148.02
