《小傳日記》魚缸復企兩萬九，北水流走要唞唞？

　　花旗１０年期國債息率降溫，隔晚花旗魚缸大幅攀升，但美匯走強不利亞洲股市，拖累香江魚缸今日高開低走，一度大跌近５００點。魚缸今朝高開２５５點，報２９７０８，升幅曾擴至３１３點，高見２９７６５，但廿天線（２９８１８）有明顯阻力。點解？因為財爺波叔接受彭博訪問時話，目前無進一步上調股票印花稅嘅打算，不過開頭有媒體話「唔排除再上調」，呢個消息都嚇到大市掉頭向下，仲愈跌愈多，唔止再次失守二萬九關，仲跌穿埋上個禮拜五嘅低位（２８９８０點），最多跌４９５點，低見２８９５７。加上銀保監會主席郭樹清表示，擔心外圍泡沫會爆，Ａ場走低，魚缸尾段都頭耷耷，最終收報２９０９５，跌３５６點或跌逾１巴仙，主板成交增加一成一至２３２７﹒２５億銀。國企指數報１１３６１，跌９２點或跌近１巴仙。恒生科技指數報９２５７，跌４０點或跌唔夠半巴仙。
　　北水再次流走，今日經港股通淨流出逾１８億銀。
　　重磅藍戰士方面，大象（００００５）唔見逾２巴仙，報４５﹒０５銀；生發發（００３８８）軟唔夠半巴仙，報４８７﹒６銀；ＡＩＡ（０１２９９）跌低３巴仙，報９６﹒８銀；神州移動（００９４１）唔見逾２巴仙，報５５銀。　
　　Ａ股反覆向下，上證綜指報３５０８，跌４２點或跌逾１巴仙；深證成指報１４７５１，跌１０６點或跌近１巴仙。總成交增加半成至９１７５億銀人仔。

＊高盛仍睇好ＱＱ彈唔高，憧憬快染藍快手升勢返＊

　　銀保監會主席郭樹清話，金融科技公司需要滿足資本充足率要求，搞到朝早造好嘅ＡＴＭＸＪ股價都隊咗落去。高盛睇好ＱＱ（００７００）未來三年前景，仲升他屐至９２９銀。ＱＱ今朝一度升近４巴仙，之後轉跌失７００關，埋單升２格，報６９８銀。據報螞蟻集團已擱置從員工手中回購股份，原因係公司估值存在不確定性，阿里巴巴（０９９８８）潛水逾２巴仙，報２２９﹒４銀；美團（０３６９０）軟逾１巴仙，報３６２﹒４銀。「染藍」熱門股之一嘅京東集團（０９６１８）走高近１巴仙，報３７７﹒８銀。至於小米（０１８１０）公開咗一項手機外觀專利，設計重點係配置四個攝像頭，逆市飛高近１巴仙，報２６﹒０５銀。
　　其他科指成分股方面，孖屐憧憬快手（０１０２４）將會受惠恒指改革加快染藍，彈起近２巴仙，報３１９銀。有傳中芯國際（００９８１）已獲得部分花旗設備廠商嘅供應許可，主要涵蓋成熟工藝所用半導體設備。中芯起哄近４巴仙，報２７﹒７５銀，為全日最醒科指。而表現最差嘅係被剔出科指嘅心動公司（０２４００），插低近７巴仙，報６６﹒８銀。

＊內房佬憂慮潤地未受累，賭收遜預期金沙滿希冀＊

　　郭樹清話，磚頭領域嘅核心問題仲係大泡沫，又話好多人買樓唔住用嚟投資會好危險，仲形容形地產係金融體系最大灰犀牛！真係嚇親一眾內房佬，中海外（００６８８）挫近２巴仙，報１９﹒１４銀；碧桂園（０２００７）挫近２巴仙，報９﹒３５銀；融創（０１９１８）無咗近２巴仙，報３２﹒３銀。反而潤地（０１１０９）就升逾３巴仙，報３７﹒４銀。
　　濠賭佬氣勢大削，全因瑞信話澳門２月賭收差過預期，反映復甦較慢。銀娛（０００２７）走低逾４巴仙，報６９﹒２銀，失守十天線（約７１﹒２４銀）。不過大和就話對呢行睇法正面，覺得金國（０１９２８）會成為黑馬，仲比佢「買入」評級，可惜金沙中國今日都係跟住跌近３巴仙，報３５﹒６銀。至於新濠（００２００）瀉近４巴仙，報１６﹒２６銀；永利澳門（０１１２８）跌逾２巴仙，報１４﹒６４銀。

＊三桶油漏油中海油擔憂，信義出成績彈高即褪色＊

　　孖屐擔心原油供過於求，搞到三桶油都漏油，漏得最多嘅係連跌３日嘅中海油（００８８３），瀉咗逾３巴仙，報８﹒８４銀。中石化（００３８６）撻低逾２巴仙，報４﹒１６銀；中石油（００８５７）插逾３巴仙，報２﹒７２銀。油服股都跟住插水，中海油服（０２８８３）滑倒３巴仙，報８﹒７銀；中石化冠德（００９３４）仆低逾１巴仙，報２﹒９１銀。
　　能源股今日最活躍係信義系，噚日齊齊派成績表，不過今日彈高後畏高插水。信義玻璃（００８６８）全年純利賺多４３巴仙，今朝見過２５﹒１銀後挫低逾１巴仙，報２３﹒３５銀。信義光能（００９６８）雖然上年賺多近９成，但大行就唔太睇好，里昂降低佢他屐價，維持買入評級。花旗除左降屐價，仲將佢評級下調到「中性」，搞到信義光能今日唔見近８巴仙，報１５﹒７８銀。至於信義能源（０３８６８）預期於今年內完成收購信義光能旗下６個太陽能電站項目，但都係要一齊跌，失近９巴仙，報４﹒３銀。請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。