《小傳日記》雖然一早都知道侵侵（特朗普）係狂人，但係佢呢種「五時花，六時變」嘅態
度，真係玩死唔少缸友！難得中美貿易戰傾掂數，滿心歡喜迎接升市之際，侵侵又無端端發脾氣
，話唔滿意傾談結果，搞到香江魚缸今朝（２３日）開市微升４２點，已係全日最好表現，之後
成班資源佬全軍覆沒，中字輩金融佬都舉白旗，拖累魚缸急跌。
雖然股王ＱＱ（００７００）、大象（００００５）曾經逆市發威，而阿爺減砵砵車進口稅
、及傳取消生育限制，汽車經銷商同埋教育佬都炒到不亦樂乎。不過，始終魚缸立立亂，ＱＱ最
後都係頂唔住，魚缸Ｕ盤時段仲要跌得勁咗，以全日最低位收市，瀉５６８點收報
３０６６５，跌近２巴仙穿四條主要平均線；Ａ場都捱打，收低逾１巴仙報３１６８，創逾一個
月最大單日跌幅，國指當然難逃沽壓，收低２５８點或２巴仙報１２０９０，成交逾１１５４億
銀。
＊ＱＱ發展雲無奈跟市震，ＡＩＡ除淨急跌好驚驚＊
ＱＱ自從喺月初低見約３７５銀後，就一口氣衝番上４００關樓上，並開始沿著條５０天線
（約４２３銀）浮浮沉沉，似乎已經擺脫咗早排弱勢。今日主席馬化騰喺「雲＋未來」峰會上面
，仲第一次提到會構建智聯網，推動各行業ＡＩ。雲業務係ＱＱ未來重點發展嘅領域，缸友聽到
都投下信心一票，可惜大市唔生性，ＱＱ收市前守唔住，微跌０﹒２巴仙收４０７銀。
另一方面，ＡＩＡ（０１２９９）月中高見逾７４銀山頂位後就反覆回落，今日除淨就當然
再跌得勁Ｄ，收低逾４巴仙報７０﹒３５銀，係跌市元兇之一。
仲有大象都守得幾好，大摩奏起魔笛，讚淨利息收入改善，仲將目標價由８８銀升到去９５
銀，距離大象７７﹒５銀收市價仲有近２３巴仙水位，全日只係跌近半巴仙！街坊渣打
（０２８８８）突然傳出同巴克萊合併消息，一度急升逾７巴仙，但巴克萊澄清話無Ｄ咁嘅事，
而渣打就唔肯評論，只係話集中執行現有策略，結果渣打收市就得番逾３巴仙落袋，報
８２﹒３５銀。
＊布油穿８０油佬眼濕濕，煤佬跌到傻電佬卻祝賀＊
「三桶油」早排受惠油價升到去三年半高，不過歡樂時光過得特別快，布油企唔穩８０美金
大關又跌番落去，入咗貨嘅缸友梗係沽貨止賺喇。中石油（００８５７）、中海油
（００８８３）、中石化（００３８６）就齊齊碌低５至６巴仙，分別收６﹒１５銀、
１３﹒６４銀同埋７﹒７銀，慘！
煤炭佬亦係重災區，阿爺出手揭抑煤價，傳出發改委要求煤企，喺６月１０日前要減價，大
阿哥神華（０１０８８）傷心走低逾６巴仙收１９﹒７６銀，藍戰中跑最尾；兗煤
（０１７１１）更加蒸發逾９巴仙收１０﹒７銀，傷勢更加嚴重。
煤佬眼濕濕，另一邊廂，電力佬當然開香檳慶祝！煤價平咗，電力佬買煤成本就當然嘥番唔
少喇！華能國際（００９０２）嘭嘭聲飛升逾５巴仙收５﹒８銀，係最威水國貨佬。街坊華能國
電（０１０７１）就有近６巴仙落袋添。華潤電力（００８３６）升１﹒５個巴仙收１５﹒８６
銀，係全日最叻仔嘅藍戰士。
＊中央降關稅進口車萬歲，經銷商反彈低吸有錢賺＊
上個禮拜花旗國同神州喺貿易談判方面暫時傾得掂數，神州抵得諗話會幫花旗國縮減貿易赤
字。跟住，神州財政部話自今年７月１號開始，降低四個轆同相關零部件嘅進口關稅，同寶馬一
齊搞生意嘅華晨（０１１１４）就逆市開ｔｕｒｂｏ，升咗逾半成，報１４﹒９８銀。同平治搞
合營嘅北汽（０１９５８）就彈起超過２巴仙，報７﹒８５銀。至於同日產搞合作嘅東風
（００４８９）都一樣升咗超過２巴仙，報９﹒１２銀。
不過，四個轆製造商嘅升勢就唔夠經銷商巴閉，永達（０３６６９）彈起超過６巴仙，報
９﹒１１銀。和諧汽車（０３８３６）就抽高近６巴仙，報４﹒４６銀。耀萊（００９７０）雖
然冇乜「刁」，成交只有三百幾萬，但全日勁飆近１３巴仙，報０﹒４銀。
另外，早排獲北水掃貨嘅阿里健康（００２４１），過去四日已經升咗近３７巴仙，今日就
有消息話佢阿媽阿里巴巴旗下嘅螞蟻金服同廣州市一齊搞金融合作。雖然唔知呢次合作有冇阿里
健康份，但都繼續獲缸友瘋狂掃貨，全日急彈近一成半，報６﹒７９銀。
＊生仔冇限制好孩子架勢，奶股好招積教育股得戚＊
有缸友收到風話，神州諗住喺２０１９年之前，全面取消實行咗４０年嘅生育限制，即係想
生幾多個都得，話係要減慢人口老化，最快可以喺今年第四季可以做決定。呢個消息一出，唔少
做細路仔生意嘅街坊都乘機炒起，好孩子國際（０１０８６）今朝就最多彈起一成，高見
５﹒５８銀，創近七年半新高，但升幅好快就縮水，最後埋單升咗近６巴仙，報５﹒３６銀。賣
奶粉嘅Ｈ＆Ｈ國際（０１１１２）都抽高超過４巴仙，報５９﹒８５銀。蒙牛（０２３１９）個
仔雅士利（０１２３０）仲勁揪，彈起近７巴仙，報２﹒１銀。
教育佬就繼續強勢，花旗今日唱好楓葉教育（０１３１７），首予「掃貨」評級，「他屐」
１８蚊，楓葉逆市炒高４巴仙，報１３﹒５４銀，最新山頂位去到１４﹒２銀。半新丁澳洲成峰
高教（０１７５２）就相當巴閉，繼今個禮拜一（２１日）坐火箭升咗超過４１巴仙後，今日朝
碌低近一成後，最多彈起近一成半，但埋單就跌咗近４巴仙，報０﹒７９銀，依然較５月１１日
入缸招親價０﹒３３銀高出超過１倍。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】本港主要銀行跟隨美聯儲減息，你對樓市前景有否信心？► 立即投票
