《小傳日記》即將送兔迎龍，今年立春就早過年初一，所以今個龍年就被稱為「盲年」。不
過比起生肖，今年更多人講嘅就係風水上由「八運」入「九運」，所以過去呢年係八運最後一年
，變化比較大，入到九運第一年就有人認為會變化更加大。
風水上以１８０年為一個正元，每６０年為一元，分上元、中元、下元，而每２０年又為一
運，過去２００４年至２０２３年係第八運，到今年就係下元之中第九運嘅開始。九運喺五行上
屬火，未來將會行足廿年火運，所以有好多行家都已經詳細列出有乜嘢屬火嘅行業係會比較受惠
，其中最常提到就係科技行業。
火喺形而上學上有變化、創新，以及係發光發亮嘅意味，所以任何關於創新同光亮嘅行業都
會喺九運之中比較有利。而科技行業既具有「創新」，同時亦有電子「發光發熱」嘅元素，所以
每當提起九運旺邊行，風水師傅都一定提到科技先。睇返現實，過去呢一年確實係科技產業嘅天
下，ＡＩ爆炸式發展，間間科技大佬都大力開發ＡＩ，而食著呢個勢，好多風水師傅都預期未來
廿年ＡＩ行業會繼續興旺。
但要留意喎，科技行業興旺唔代表科技股興旺，魚缸入面可以叫做科技股嘅股份都有唔少，
但唔係隻隻會受惠。九運強調要具有「創新」、「變化」元素嘅公司先會受惠，如果有啲科技股
創新程度少好多嘅，就自然難以受惠。如今ＡＴＭ入面，就只有ＱＱ（００７００）被認為仲有
一定程度維持到創新，簡而言之就係越創新就越食到九運。
唔夠創新食唔到九運，如果業務實際上科技元素少啲，就難啲「有運行」。好似美團
（０３６９０），雖然身為重磅科技股之一，但美團主業係送外賣，實際上物流嘅行業特色比較
重，而物流係屬水嘅行業，水火不容，所以行九運係會不利屬水行業，如果美團再唔喺創新科技
方面突圍，加返啲「火」，未來前路將會非常難行！
科技股過去兔年都已經跌足全年，如果九運真係有利科技嘅，寄望恒指入面呢個重點板塊真
係有運行啦！祝大家新年進步，生意興「龍」，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】拜登宣布競逐連任，若民主黨讓賀錦麗代替參選會否有效爭取選票？► 立即投票
